2. Mosesgirji 9

₁Hearrá sártnui Mosesii: “Mana farao lusa ja cealkke sutnje: Ná cealká Hearrá, hebrealaččaid Ipmil: Luoitte mu álbmoga vuolgit, vai sii besset bálvalit mu. ₂Jos don biehttalat luoitimis sin ja ain doaladat sin, ₃de Hearrá časká garra rohttudávddain du omiid mat leat giettis, heasttaid, áseniid, kamelaid, stuorraomiid ja smávvaomiid. ₄Muhto Hearrá dahká erohusa israellaččaid ja egyptalaččaid omiid gaskkas, iige israellaččaid omiin jáme ii oktage. ₅Hearrá lea mearridan áiggi ja lea dadjan ahte ihttin son dahká dan dán eatnamis.” ₆Maŋit beaivvi Hearrá dagai nugo lei sárdnon. Buot egyptalaččaid oamit jápme, muhto israellaččaid omiin ii jápmán ii oktage. ₇Go farao gulaskuttai ášši, de son bođii diehtit ahte ii oktage israellaččaid omiin lean jápmán. Muhto farao buoššudii váimmus, iige son luoitán álbmoga.

₈Hearrá sártnui Mosesii ja Aronii: “Váldi uvnnas čorpma dievva gieba, ja Moses galgá bohrralahttit dan áibmui farao ovddas. ₉Dalle giehpa bieđgana gavjan miehtá oppa Egypta, ja das šaddet siedjabuhkkot olbmuide ja omiide oppa Egypta eatnamis.” ₁₀Soai válddiiga gieba uvnnas, ja go soai čuoččuiga farao ovddas, de Moses bohrralahtii gieba áibmui, ja olbmuide ja omiide ihte siedjabuhkkot. ₁₁Diehttit eai sáhttán loaiddastit Mosesa ovdii buhkkuid geažil, dasgo buhkkot ledje dihttiin ja eará egyptalaččain. ₁₂Muhto Hearrá buoššudii farao váimmu, iige farao guldalan Mosesa ja Arona, nugo Hearrá lei cealkán Mosesii.

₁₃Hearrá sártnui Mosesii: “Mana árrat iđedis farao lusa ja cealkke sutnje: Ná cealká Hearrá, hebrealaččaid Ipmil: Luoitte mu álbmoga vuolgit, vai sii besset bálvalit mu. ₁₄Dán háve mun divttán buot mu givssiid deaividit du, du hoavvaolbmáid ja du álbmoga, vai don ipmirdivččet ahte máilmmis ii leat oktage mu veardásaš. ₁₅Mun livččen juo ovdal sáhttán geiget gieđa ja časkit du ja du álbmoga rohttudávddain, nu ahte dii livččiidet ollásit sihkkasan eatnama alde. ₁₆Muhto mun lean seastán du, vai beasan čájehit dutnje iežan fámu ja vai mu namma beaggá miehtá máilmmi. ₁₇Muhto jos don ain hehttet mu álbmoga vuolgimis, ₁₈de ihttin dán muttos mun divttán čuorpmastit garrasit, iige Egyptas leat leamaš dakkár dálki goassege dan rájes go Egypta vuođđuduvvui, gitta dán beaivvi rádjái. ₁₉Gohčo dál bidjat suodjái omiidat ja buot mii dus lea olgun. Buot olbmot ja eallit mat leat olgun ja mat eai leat biddjojuvvon suodjái, jápmet go čuorpmasta.” ₂₀Dat farao hoavvaolbmát geat balle Hearrá sánis, bidje bálvaleddjiideaset ja omiideaset suodjái, ₂₁muhto dat geat eai beroštan Hearrá sánis, dikte bálvaleddjiideaset ja omiideaset orrut giettis.

₂₂Hearrá sártnui Mosesii: “Geige gieđa almmi guvlui, de čuorpmastišgoahtá oppa Egyptas olbmuid, omiid ja šattuid ala.” ₂₃Moses geigii soappis almmi guvlui, ja Hearrá divttii boahtit bajána ja čuorbmasiid, ja álddagasat časke eatnamii. Hearrá divttii čuorpmastit miehtá Egypta, ₂₄ja álddagasat šleđgo čuorbmasiid gaskkas. Čuorpmasdálki lei nu garas ahte dakkára ii oktage lean muosáhan Egyptas dan rájes go olbmot ásse dohko. ₂₅Čuorbmasat njeide Egyptas eatnamii buot mii lei olgun, sihke olbmuid ja omiid. Dat duššadedje buot eatnama šattuid ja dodje vel muoraidge. ₂₆Dušše Gosenis gos israellaččat ásse, ii čuorpmastan.

₂₇Farao rávkkai lusas Mosesa ja Arona ja dajai sudnuide: “Dán háve mun lean suddudan. Hearrá lea vuoigadis, ja mun ja mu álbmot leat sivalaččat. ₂₈Rohkadalli Hearrá, dál mii leat ožžon Ipmila bajándálkki ja čuorpmasteami galle. Mun luoittán din mannat. Dii ehpet dárbbaš leat šat dáppe.” ₂₉Moses dajai sutnje: “Go mun vuolggán dán gávpogis, de mun lokten gieđaid ja rohkadalan Hearrá. Dalle baján heaitá jullamis iige šat čuorpmas, ja das don ipmirdat ahte eanan gullá Hearrái. ₃₀Muhto mun dieđán ahte it don eaige du hoavvaolbmát veláge bala Hearrás, Ipmilis.” ₃₁Beallemas ja bivgi lei duššan, danin go bivggis ledje juo gordneoaivvit ja beallemasas diehpit, ₃₂muhto nisut ja spealttat eai lean duššan, dainna go dat láddet maŋŋelis.

₃₃Moses vulggii farao luhtte, manai olggos gávpogis ja loktii gieđaid Hearrá guvlui. Dalle heittii jullamis ja čuorpmasteames, iige arvi šat šoallan. ₃₄Muhto go farao oinnii ahte lei heaitán arvimis, čuorpmasteames ja jullamis, de son suddudii ain ja buoššudii váimmus, son oktan hoavvaolbmáidisguin. ₃₅Farao buoššudii ain váimmus iige luoitán israellaččaid, nugo Hearrá lei sárdnon Mosesa bokte.