Esekiel 3

₄Dasto son celkkii munnje: “Olmmoš, mana israellaččaid lusa ja sártno sidjiide mu sániid. ₅Don it vuolggahuvvo dakkár álbmoga lusa man giela lea váttis dahje veadjemeahttun áddet, muhto israellaččaid lusa. ₆It don vuolggahuvvo daid ollu álbmogiid lusa maid giela lea váttis dahje veadjemeahttun áddet ja maid sániid don it ipmir. Jos mun vuolggahivččen du daid lusa, de dat gulašedje du. ₇Muhto israellaččat eai dáhto gullat du, danin go sii eai dáhto gullat mu. Sis buohkain lea garra gállu ja garra váibmu. ₈Mun dagan du muođuid seammá garasin go sin muođut ja du gállu seammá garasin go sin gállu. ₉Mun dagan du gállu seammá garasin go diamánta, garraseabbon go geađgi. Ale bala sis alege suorgan, siihan leat gážžáris álbmot.” ₁₀Dasto son celkkii munnje: “Olmmoš, guldal dárkilit ja muitte buot maid mun sártnun dutnje. ₁₁Mana dasto eret dolvojuvvon olbmuid lusa, iežat álbmoga olbmuid lusa, ja sártno sidjiide. Juogo sii gullet dahje leat gulakeahttá, de cealkke sidjiide: ‘Ná cealká Hearrá Ipmil.’”

₁₂Vuoigŋa loktii mu, ja mun gullen iežan maŋábealde garra šláma, go Hearrá hearvásvuohta loktanii sajistis. ₁₃Heakkalaččaid soaját skohče go dat guoskkahedje nuppit nuppiid, ja jorrit daid bálddas jupme, gullui stuorra jupma. ₁₄Vuoigŋa loktii mu ja dohppii fárrosis. Mun johten bahča mielain ja suhtus, ja Hearrá giehta dettii mu lossadit. ₁₅Mun bohten daid eret dolvojuvvon olbmuid lusa Tel Avivas, geat ásse Kebarjoga gáttis. Doppe mun čohkkájin gáfestuvvan sin gaskkas čieža beaivvi.

₁₆Čieža beaivvi geažes munnje bođii Hearrá sátni: ₁₇Olmmoš, mun bijan du israellaččaid goziheaddjin. Go don gulat sáni mu njálmmis, de don galggat cuiggodit sin mu beales. ₁₈Jos mun cealkkán ipmilmeahttumii: “Don šattat jápmit”, itge don leat cuiggodan su itge várren su dahkamis baháid, vai su heagga gáddjojuvvošii, de ipmilmeahttun jápmá vearredaguidis geažil, ja mávssu su varas mun gáibidan dus. ₁₉Muhto jos don leat cuiggodan ipmilmeahttuma iige son liikká jorgal bahávuođastis iige vearredaguinis, de son šaddá jápmit suttus geažil, muhto don leat gádjon iežat heakka. ₂₀Jos vanhurskkis jorgala vanhurskkisvuođastis ja dahká vearrivuođa go mun bijan jorralangeađggi su ovdii, de son šaddá jápmit. Jos don it leat cuiggodan su, de son jápmá suttus geažil. Su vanhurskkis dagut eai muitojuvvo, ja mávssu su varas mun gáibidan dus. ₂₁Muhto jos don várret vanhurskása suddudeames, iige son, vanhurskkis olmmoš, dalle suddut, de son beassá eallit danin go válddii vára várrehusas, ja don leat gádjon iežat heakka.

₂₂Doppe Hearrá giehta guoskkahii mu. Hearrá celkkii munnje: “Njieja leahkái, doppe mun sártnun dutnje.” ₂₃Mun njidjen leahkái, ja doppe lei Hearrá hearvásvuohta, seammá go maid ledjen oaidnán Kebarjoga gáttis. Mun gahččen eatnamii gopmut. ₂₄Muhto munnje bođii vuoigŋa ja loktii mu čuoččat. Son celkkii munnje: “Mana vissosat ja dahpa iežat dohko. ₂₅Olmmoš, sii dohppejit báttiid ja čatnet du daiguin, nu ahte it beasa olbmuid lusa. ₂₆Ja du njuokčama mun divttán darvánit guopmái, nu ahte don šattat gielaheapmin itge sáhte ráŋgut sin. Siihan leat gážžáris álbmot. ₂₇Muhto go mun sártnun dutnje, de mun rabastan du njálmmi. Dalle don galggat cealkit sidjiide: ‘Ná cealká Hearrá Ipmil.’ Gullos gii dáhttu gullat, ja lehkos gulakeahttá gii ii dáhto. Siihan leat gážžáris álbmot.”