1. Mosesgirji 28

₁Nu Isak rávkkai Jakoba lusas, buressivdnidii su ja dajai: “Ale váldde áhkkán kanaanlaš nieidda. ₂Vuolgge baicca Paddan Aramii, eatnát áhči Betuela bearraša lusa, ja váldde doppe áhká ednot Labana nieiddain. ₃Vare Buotveagalaš Ipmil buressivdnidivččii du ja dagašii du šattolažžan ja eatnagin, nu ahte dus šaddet máŋga álbmoga. ₄Vare son attášii dutnje ja du nállái Abrahama buressivdnádusa, nu ahte don válddát oapminat dán eatnama maid Ipmil attii Abrahamii ja mas don dál ásat vierisin.” ₅De Isak vuolggahii Jakoba mátkái, ja Jakob vulggii Paddan Aramii aramealaš Labana, Betuela bártni, lusa gii lei Jakoba ja Esau eanu.

₆Esau gulai ahte Isak lei buressivdnidan Jakoba ja vuolggahan su Paddan Aramii váldit doppe alccesis áhká, ja ahte Isak lei buressivdnidan su ja gieldán su váldimis áhká kanaanlaččaid nieiddain. ₇Jakob lei jeagadan áhčis ja eatnis ja vuolgán Paddan Aramii. ₈Dalle Esau ipmirdii ahte su áhčči Isak ii liikon kanaanlaš nissoniidda. ₉Nu son manai Abrahama bártni Ismaela lusa ja válddii áhkás guoktá lassin áhkkán Ismaela nieidda Mahalata, Nebajota oappá.

₁₀Jakob vulggii Beer Šebas ja manai Harrana guvlui. ₁₁Go beaivi luoitádii, de son bisánii muhtun báikái idjii, válddii das geađggi oaivvevuložin ja veallánii.

₁₂Ihkku Jakob niegadii ráidalasa mii olii eatnamis gitta albmái, ja Ipmila eŋgelat gorgŋo ja njidje dan ráidalasa. ₁₃Ja Hearrá čuoččui su bálddas ja celkkii: “Mun lean Hearrá, áhčát Abrahama Ipmil ja Isaka Ipmil. Dán eatnama man alde don veallát, mun attán dutnje ja du nállái. ₁₄Du nálli šaddá eatnagin dego eatnama sáttočalmmit, ja don viidánat oarjjás ja nuorttas, davás ja lulás, ja du ja du náli bokte buressivdniduvvojit buot eatnama sogat. ₁₅Mun lean duinna ja várjalan du gosa ihkinassii don jođát, ja mun buvttán du ruoktot dán eatnamii. Mun in guođe du, muhto ollašuhtán dan maid lean lohpidan dutnje.”

₁₆Jakob morihii niegustis ja dajai: “Hearrá lea duođaid dán báikkis, inge mun diehtán dan.” ₁₇De son ballái ja dajai: “Dát lea hirpmus báiki! Dás lea vissásit Ipmila viessu ja almmi poarta.” ₁₈Árrat iđedis Jakob válddii geađggi mii sus lei leamaš oaivvevuložin, ceggii dan bázzin ja golggahii oljju dan ala. ₁₉Son gohčui dan báikki Betelin; ovdal dan gávpoga namma lei leamaš Lus.

₂₀Jakob dagai lohpádusa ja dajai: “Jos Ipmil lea muinna ja várjala mu dán mátkkis, ja jos son addá munnje láibbi borrat ja biktasiid gárvun ₂₁nu ahte mun beasan ráfis máhccat áhččán vissui, de Hearrá lea mu Ipmil. ₂₂Dán báikái masa mun ceggejin geađggi, šaddá Ipmila bassibáikin. Buot das maid don attát munnje, mun attán dutnje logádasaid.”