1. Mosesgirji 30

₁Go Rakel oinnii ahte son ii ožžon mánáid, de son gáđaštišgođii oappás ja dajai Jakobii: “Veahket mu oažžut mánáid, muđui mun jámán!” ₂Dalle Jakob suhtai Rakelii ja dajai: “Leango mun mahkáš Ipmil? Sonhan lea gieldán dus heakkašattu.” ₃Rakel dajai: “Dá lea mu šlávvanieida Bilha. Mana su lusa, vai son riegádahtášii mu askái, ja nu mun maid oččošin mánáid su bokte.” ₄Rakel attii šlávvanieiddas Bilha Jakobii, ja Jakob manai su lusa. ₅Bilha šattai áhpeheapmin ja riegádahtii Jakobii bártni. ₆Dalle Rakel dajai: “Ipmil lea čoavdán mu ášši, son lea gullan mu rohkadusa ja addán munnje bártni.” Danne Rakel bijai bárdnái namman Dan. ₇Rakela šlávvanisson Bilha šattai fas áhpeheapmin ja riegádahtii Jakobii nuppi bártni. ₈Rakel dajai: “Mun lean fággádallan garrasit oappáinan ja lean vuoitán.” Ja son bijai bárdnái namman Naftali.

₉Go Lea oinnii ahte son ii ožžon šat mánáid, de son attii iežas šlávvanieidda Silpa Jakobii áhkkán, ₁₀ja Lea šlávvanisson Silpa riegádahtii Jakobii bártni. ₁₁Lea dajai: “Vuoi dán lihku!” Ja son bijai bárdnái namman Gad. ₁₂Dasto Lea šlávvanisson Silpa riegádahtii Jakobii velá nuppi bártni, ₁₃ja Lea dajai: “Gal mun juo lean lihkolaš! Dál nissonat rámidit mu lihkolažžan.” Ja son bijai bárdnái namman Ašer.

₁₄Go Ruben oktii nisolájuid áigge lei meahcis, de son gávnnai gierranmurjjiid ja doalvvui daid eadnásis Leai. Dalle Rakel dajai Leai: “Atte munnje gierranmurjjiin maid du bárdni lea gávdnan!” ₁₅Dalle Lea dajai sutnje: “Uhccángo dat lea ahte don leat váldán mu boatnjá, go don dál áiggut váldit bárdnán gierranmurjjiidge?” Muhto Rakel dajai: “Jakob oažžu veallát duinna otnáš ija, go mun fal oaččun bártnát gierranmurjjiid.” ₁₆Ja go Jakob eahkedis máhcai meahcis, de Lea manai su ovddal ja dajai: “Don galggat dál boahtit mu lusa, dasgo mun lean oastán du alccesan bárdnán gierranmurjjiiguin.” Ja Jakob veallái suinna dan ija. ₁₇Ipmil gulai Lea rohkadusa, ja Lea šattai áhpeheapmin ja riegádahtii Jakobii viđát bártni. ₁₈Dalle Lea dajai: “Ipmil lea bálkkašan mu go mun adden iežan šlávvanissona boadnjásan.” Ja son bijai bárdnásis namman Isaskar. ₁₉De Lea šattai fas áhpeheapmin ja riegádahtii Jakobii guđát bártni. ₂₀Dalle Lea dajai: “Ipmil lea addán munnje buori attáldaga. Dál mu boadnjá viimmat gudnejahttá mu, danin go mun lean riegádahttán sutnje guhtta bártni.” Ja son bijai bárdnái namman Sebulon. ₂₁Maŋŋil Lea riegádahtii vel nieidda ja bijai sutnje namman Dina.

₂₂Muhto Ipmil muittii maiddái Rakela. Son gulai su rohkadusa ja divttii su šaddat šattolažžan. ₂₃Ja Rakel šattai áhpeheapmin ja riegádahtii bártni. Son dajai: “Ipmil lea váldán eret mu heahpada.” ₂₄Son bijai bárdnái namman Josef ja dajai: “Vare Hearrá attášii munnje vel nuppi bártni!”

₂₅Go Rakel lei riegádahttán Josefa, de Jakob dajai Labanii: “Luoitte mu vuolgit, vai mun beasan mannat iežan báikái ja iežan eatnamii. ₂₆Atte munnje áhkáidan ja mánáidan geaid dihte mun lean bálvalan du, ja de mun vuolggán. Don dieđát ieš man bures mun lean bálvalan du.” ₂₇Laban vástidii: “Vare don gulašit mu! Mu lean diidamearkkain oaidnán ahte Hearrá lea buressivdnidan mu du dihte.” ₂₈Ja son dajai vel: “Mearrit ieš maid siđat mus bálkán, de mun mávssán dan.” ₂₉Jakob dajai sutnje: “Don dieđát ieš mo mun lean bálvalan du ja mo du oapmeeallu lea sturron ja laskan mu geahčus. ₃₀Dasgo dat uhccánaš mii dus lei ovdal go mun bohten, lea dál šaddan stuorra eallun, ja juohke sajis gos mun lean leamaš, de Hearrá lea buressivdnidan du. Muhto goas mun beasan bargagoahtit iežan bearraša ovdii?” ₃₁Dalle Laban jearai: “Maid mun galggašin addit dutnje?” Jakob dajai: “It don dárbbaš addit munnje maidege. Muhto jos mieđat dasa maid mun dál dajan, de mun ain guođohan ja geahčan du omiid. ₃₂Odne mun geahčadan oppa du oapmeealu ja rátkkán das sierra buot sávzzaid mat leat čáhppadat ja buot gáiccaid mat leat girjjagat ja dilkot: Lehkos dat mu bálká. ₃₃Mun bijan gudnán pántan: Go don dasto boađát geahčadit ealu mii lea šaddan mu bálkán, de buot gáiccaid mat eai leat dilkot dahje girjjagat ja buot sávzzaid mat eai leat čáhppadat, oažžu atnit suolaoapmin.” ₃₄Laban vástidii: “Nu fal, šaddos nugo don dajat.” ₃₅Seammá beaivvi Laban rátkkii sierra bohkáid mat ledje stábagat ja girjjagat ja buot gáiccaid mat ledje dilkot ja girjjagat, buot main lei vehášge vielgat, ja buot čáhppes sávzzaid. Daid son attii bártniidis gehččui. ₃₆Dasto Laban sirddii dan ealu golbma beaivása eret Jakobis, gii guođohii Labana eará sávzzaid ja gáiccaid.

₃₇Jakob válddii poppela, mandelmuora ja platána ovssiid ja lanjahii daidda stábiid, nu ahte soppiin šattai vilges muorra oidnosii. ₃₈De son bijai lanjahuvvon ovssiid omiid ovdii jugahangárcuide, čáhcegáriide main dat fitne juhkamin. ₃₉Oamit mat ledje doallan ragada ovssiid ovddas, gudde stábagiid, dilkuid ja girjjagiid. ₄₀Daid lábbáid Jakob rátkkii alccesis. Go omiin lei fas iežaset ragatáigi, de son divui daid njuniid Labana ealu stábat ja čáhppes sávzzaid guvlui. Iežas ealuid son doalai sierra iige luoitán daid mastat Labana sávzzaiguin ja gáiccaiguin. ₄₁Juohke háve go gievrras omiin álggii ragat, de Jakob bijai ovssiid čáhcegáriide omiid ovdii, vai dat ragašedje ovssiid luhtte. ₄₂Muhto heajos omiid ovdii son ii bidjan ovssiid, ja nu gárte heajos oamit Labanii ja gievrras oamit fas Jakobii. ₄₃Jakob šattai hui rikkisin, ja sus ledje hui ollu sávzzat ja gáiccat, šlávvanissonat ja šlávat, kamelat ja ásenat.