1. Mosesgirji 39

₁Josef dolvojuvvui Egyptii, ja egyptalaš Potifar, gii lei farao hoavvahearrá ja heaggafávttaid oaivámuš, osttii su ismaellaččain geat ledje buktán su dohko. ₂Hearrá lei Josefiin, ja danne sutnje lihkostuvai buot. Son orui egyptalaš isidis viesus, ₃ja isit oinnii ahte Hearrá lei Josefiin ja divttii buot doaimmaid lihkostuvvat sutnje. ₄Potifar liikui Josefii gii bálvalii su nu bures, ja bijai su hálddašit iežas dállodoalu ja oskkildii su gihtii buot mii sus lei. ₅Go Potifar lei bidjan Josefa hálddašit iežas dállodoalu ja buot mii sus lei, de Hearrá buressivdnidii egyptalačča viesu Josefa dihte. Hearrá buressivdnádus dihttui buot das mii Potifaris lei, sihke ruovttus ja bealddus. ₆Dan dihte Potifar attii Josefa háldui buot mii sus lei, iige son fuolahan ieš maidege eará go dan maid borai.

Josef lei čáppis ja hámálaš. ₇De muhtun áiggi geažes isida áhkká geahčastallagođii Josefii. Son dajai: “Veallá muinna!” ₈Muhto Josef biehttalii ja dajai isidis áhkkái: “Mu isit ii šat beroš mastege, muhto lea oskkildan mu gihtii buot mii sus lea. ₉Mus lea dán viesus seammá ollu dadjamuš go sus, iige son leat gieldán mus maidege earret du, danne go don leat su áhkká. Mo mun dalle sáhtášin dahkat ná stuorra bahávuođa ja suddudit Ipmila vuostá?” ₁₀Vaikko nisson beaivvis beaivái hálahii Josefa, de Josef ii miehtan veallát suinna iige leat su lahka.

₁₁Muhtun beaivvi go Josef fas bođii vissui doaimmahit bargguidis iige oktage dálu olbmuin lean das, ₁₂de Potifara áhkká dohppii Josefa biktasii ja dajai: “Veallá muinna!” Dalle Josef báhtarii olggos, muhto su bivttas bázii nissona gihtii. ₁₃Go nisson oinnii ahte Josef lei guođđán biktasa su gihtii ja báhtaran, ₁₄de son čuorvvui dálu olbmuid ja dajai: “Gehččet! Potifar lea buktán deike hebrealaš olbmá gii dál atná min bilkun. Son bođii mu lusa ja vikkai veallát muinna, muhto mun čurvon alla jienain. ₁₅Go son gulai mu biškkádeamen ja čuorvumin, de son guđii iežas biktasa dása ja báhtarii olggos.”

₁₆Nisson doalai Josefa biktasa dassážii go su boadnjá bođii ruoktot. ₁₇Son muitalii boadnjásis seammá láhkái: “Duot hebrealaš šlávva gean don leat buktán deike, bođii mu lusa ja vikkai heahppášuhttit mu. ₁₈Muhto go mun biškkádin ja čurvon, de son guđii biktasa dása ja báhtarii olggos.”

₁₉Go isit gulai áhkás muitaleamen maid su šlávva lei dahkan, de son moaráhuvai. ₂₀Isit válddii Josefa gitta ja bijai su giddagassii, dan báikái gos gonagasa fáŋggat ledje. ₂₁Muhto Hearrá lei Josefa mielde giddagasas, nu ahte giddagasa hoavda liikui sutnje. ₂₂Hoavda attii buot giddagasa fáŋggaid Josefa háldui. Josef anii fuola buot das mii doppe dahkkojuvvui. ₂₃Giddagasa hoavda ii geahččan bearrái maidege das mii lei Josefa hálddus, dasgo Hearrá lei Josefiin ja divttii sutnje lihkostuvvat buot maid son dagai.