1. Mosesgirji 40

₁Muhtun áiggi das maŋŋil dáhpáhuvai ahte Egypta gonagasa alimus juhkamušaddi ja láibedahkki rihkuiga hearráska, Egypta gonagasa, vuostá. ₂Farao moaráhuvai hoavvahearrá guoktái, alimus juhkamušaddái ja alimus láibedahkkái, ₃ja bijai sudno heaggafávttaid oaivámučča vissui, seammá giddagassii gos Josef lei. ₄Heaggafávttaid oaivámuš gohčui Josefa atnit fuola dan guoktás ja bálvalit sudno.

Nu soai leigga giddagasas muhtun áiggi. ₅Giddagasas Egypta gonagasa juhkamušaddi ja láibedahkki niegadeigga goabbáge niegu ovttat ija. Soai niegadeigga sierra niegu, ja nieguin lei sierra čilgehus. ₆Go Josef iđedis bođii sudno lusa, de son oinnii ahte soai leigga morašlaččat. ₇Dalle son jearai farao hoavvahearrá guoktás geat leigga fáŋgan ovttas suinna su isida viesus: “Manne dudnos lea odne nu morašlaš hápmi?” ₈Soai vástideigga: “Moai letne niegadan niegu, iige dáppe leat oktage gii máhttá čilget daid.” Josef dajai: “Nieguid čilgehusat bohtet Ipmilis, muhto muitaleahkki fal maid leahppi niegadan.”

₉De alimus juhkamušaddi muitalii iežas niegus Josefii ja dajai: “Mu niegus lei viidnemuorra mu ovddas. ₁₀Viidnemuoras ledje golbma oavssi. Dan seammás go dasa ihtigohte urbbit, de dasa bohciidedje lieđit ja dan muorjjit ládde. ₁₁Mus lei gieđas farao juhkangearra, ja mun válden murjjiid ja bahčen daid sáhpi farao gerrii ja adden geara farao gihtii.” ₁₂Josef dajai sutnje: “Dát lea du niegu čilgehus: Dat golbma oavssi leat golbma beaivvi. ₁₃Golmma beaivvi geažes farao bajida du ja bidjá du fas juhkamušaddin. Don oaččut addit juhkangeara farao gihtii seammá láhkái go ovdalge, dalle go ledjet su juhkamušaddi. ₁₄Muhto muitte mu go dutnje geavvá bures, ja daga munnje dán buori: Sártno mu beales faraoi ja veahket mu beassat eret dán viesus! ₁₅Mun lean suoláduvvon hebrealaččaid eatnamis, ja dáppe mun lean sivaheapmin biddjojuvvon giddagassii.”

₁₆Go alimus láibedahkki gulai man bures Josef čilgii niegu, de son dajai: “Mu niegus lei seammá ládje, mun niegadin ahte mus ledje oaivvi alde golbma veaddelihti maid dievva ledje nisoláibbit. ₁₇Bajimus veaddelihtis ledje buotlágán láibbit borramuššan faraoi, muhto lottit borre daid veaddelihtis mii mus lei oaivvi alde.” ₁₈Josef vástidii: “Dát lea du niegu čilgehus: Dat golbma veaddelihti leat golbma beaivvi. ₁₉Golmma beaivvi geažes farao bajida du: Son heŋge du murrii, ja almmi lottit borret du oačči.”

₂₀Goalmmát beaivvi faraos lei riegádanbeaivi, ja son dagai guossemállásiid buot bálvaleddjiidasas. Dalle son bajidii alimus juhkamušaddi ja láibedahkki bálvaleddjiidis oaidnut. ₂₁Alimus juhkamušaddi son bijai ovddeš virgái, nu ahte son oaččui fas addit juhkangeara farao gihtii, ₂₂muhto alimus láibedahkki harcejuvvui, aiddo nugo Josef lei čilgen sudno nieguid. ₂₃Alimus juhkamušaddi ii muitán Josefa, muhto vajáldahtii su.