1. Mosesgirji 41

₁Guokte jagi das maŋŋil farao niegadii ahte son lei čuožžumin Nileanu gáttis. ₂Nileanus gorgŋo čieža čáppa ja ađđás gusa mat guohtugohte eatnogátti rási. ₃Daid maŋis eanus gorgŋo čieža eará gusa mat ledje romit ja guoirasat. Dat čuoččastedje eatnogáddái daid eará gusaid gurrii, ₄ja dat romes ja guoira gusat borre dan čieža ađđás ja čáppa gusa. De farao gohccái. ₅Son oađđái fas ja niegadii nuppi niegu. Čieža dievas ja buorre gordneoaivvi šadde ovttat oalggas. ₆Daid maŋŋil bohciidedje vel čieža guorba ja guoros gordneoaivvi maid nuortabiegga lei goldnadan, ₇ja dat guoros gordneoaivvit njille dan čieža dievas ja buori gordneoaivvi. De farao gohccái ja ipmirdii ahte dat lei leamaš niehku.

₈Iđedis farao miella lei ráfeheapme, ja son rávkkai lusas buot Egypta einnosteddjiid ja viisáid. Farao muitalii sidjiide nieguidis, muhto ii oktage máhttán čilget daid sutnje. ₉Dalle alimus juhkamušaddi dajai faraoi: “Dál mun ferten muitáhit iežan rihkkosa. ₁₀Farao lei oktii moaráhuvvan bálvváidasas ja bijai mu ja alimus láibedahkki giddagassii heaggafávttaid oaivámučča vissui. ₁₁Ovttat ija moai goappašagat niegadeimme niegu, mun ja son, ja goappáge nihkui lei iežas čilgehus. ₁₂Doppe lei ovttas munnuin nuorra hebrealaš olmmái, heaggafávttaid oaivámučča bálvá. Moai muitaleimme sutnje nieguideame, ja son čilgii daid munnuide. ₁₃Ja munnuide geavai aiddo nugo son lei čilgen: Mun biddjojuvvojin fas juhkamušaddin, muhto láibedahkki farao heŋgii harcamurrii.”

₁₄Dalle farao rávkkai Josefa lusas. Son vižžojuvvui hoahpus giddagasas, su vuovttat ja skávžžát čuohpahuvvojedje ja sutnje gárvvuhuvvojedje ođđa biktasat. De son loaiddastii farao ovdii. ₁₅Farao dajai Josefii: “Mun lean niegadan niegu, iige oktage máhte čilget dan. Muhto munnje lea muitaluvvon ahte go don gulat nieguid, de don máhtát čilget daid.” ₁₆Josef vástidii faraoi: “Ii dat leat mu válddis, duššefal Ipmil máhttá addit faraoi buori vástádusa.”

₁₇Dalle farao muitalii Josefii: “Niegustan mun ledjen čuožžumin Nileanu gáttis. ₁₈Dalle eanus gorgŋo čieža ađđás ja čáppa gusa, ja dat guohtugohte rási. ₁₉Daid maŋis gorgŋo vel čieža eará gusa mat ledje nu skurdnjasat, guoirasat ja romit ahte in leat oppa Egypta eatnamis oaidnán nu romes gusaid. ₂₀Duot guoira ja romes gusat borre dan čieža ađđás gusa. ₂₁Muhto vaikko dat ledje borran daid, de ii almmatge dovdon ahte dat ledje mannan daid čoavjái. Dat ledje seammá romit oaidnit go ovdal. De mun gohccájin. ₂₂De mun fas niegadin. Čieža dievas ja čáppa gordneoaivvi šadde ovttat oalggas. ₂₃Muhto daid maŋis bohciidedje čieža guoros ja guorba gordneoaivvi maid nuortabiegga lei goldnadan. ₂₄Ja dat guoros gordneoaivvit njille dan čieža buori gordneoaivvi. Mun muitalin nieguidan einnosteddjiide, muhto ii oktage máhte čilget daid munnje.”

₂₅Josef dajai faraoi: “Farao niegut mearkkašit seammá. Ipmil lea muitalan faraoi maid áigu dahkat. ₂₆Dat čieža buorre gusa mearkkašit čieža jagi, ja dat čieža buorre gordneoaivvi mearkkašit maid čieža jagi. Guktot niegut mearkkašit seammá. ₂₇Dat čieža guoira ja romes gusa mat gorgŋo daid maŋis, mearkkašit čieža jagi, ja dat čieža guoros gordneoaivvi maid nuortabiegga lei goldnadan, mearkkašit čieža nealgejagi. ₂₈Go mun dadjen ahte Ipmil lea muitalan faraoi maid áigu dahkat, de mun oaivvildin dán: ₂₉Bohtet čieža jagi goas lea stuorra valljugasvuohta oppa Egyptas, ₃₀muhto daid maŋis bohtet čieža dakkár nealgejagi ahte Egypta valljugasvuohta vajálduvvá, ja nealgi guorbada eatnama. ₃₁Dan nealggi geažil ovddit jagiid valljugasvuohta ii šat dihtto, danin go nealgi šaddá hui garasin. ₃₂Go farao niehku gerdojuvvui guovtte geardái, de dat mearkkaša ahte Ipmil lea vissásii mearridan ášši ja ollašuhttá dan fargga. ₃₃Danin farao galggašii ohcat jierbmás ja viissis olbmá stivret Egypta. ₃₄Farao galggašii maid ásahit fálddiid miehtá riikka rádjat vuorkái viđádasa Egypta šattus čieža valljugasvuođa jagi. ₃₅Boahttevaš buriid jagiid áigge fálddit galget rádjat buotlágán borramuša ja ásahit gávpogiidda gordnerájuid mat leat farao gieđas. ₃₆Dat gordni lea riikka olbmuide borramuššan dan čieža nealgejahkái mat bohtet Egypta eatnamii, vai eanan ii roahppán nealgái.”

₃₇Dan sága farao ja buot su bálvaleaddjit atne buorrin, ₃₈ja farao dajai sidjiide: “Leago oktage olmmái geas lea Ipmila vuoigŋa nugo sus?” ₃₉Josefii farao dajai: “Go Ipmil lea almmuhan dutnje buot dán, de ii sáhte leat oktage nu jierbmái ja viissis go don. ₄₀Don oaččut ráđđet mu viesu, ja oppa mu álbmot galgá jeagadit du sáni. Duššefal truvnnu dáfus mun lean stuorit go don.”

₄₁Farao dajai vel Josefii: “Ná mun bijan du ráđđet oppa Egypta.” ₄₂De farao válddii iežas seailasuorbmasa suorpmas ja bijai dan Josefa surbmii, gárvvuhii sutnje fiinna beallemasbiktasiid ja heaŋggastii golleviđjjiid su čeabehii. ₄₃Son divttii Josefa vuodjit nubbin buoremus vovnnainis, ja Josefa ovddas čurvojuvvui: “Abrek!” Nu farao dagai su oppa Egypta ráđđejeaddjin. ₄₄Farao dajai Josefii: “Mun lean farao, muhto almmá du lobi haga ii oktage oaččo dahkat maidege oppa Egyptas.” ₄₅Farao bijai Josefii namman Safenat Paneah ja attii sutnje áhkkán Asenata, Ona báhpa Poti Fera nieidda.

₄₆Josef lei golbmalogijahkásaš go loaiddastii farao, Egypta gonagasa, ovdii.

Josef vulggii farao luhtte ja mátkkoštii miehtá Egypta. ₄₇Eanan šaddadii gortni čomaid čomaid dan čieža valljugasvuođa jagi. ₄₈Dan čieža valljugasvuođa jagi mat ledje Egyptas, Josef čohkkii buotlágán borramuša ja rájai dan gávpogiidda. Son rájai guđege gávpogii dan borramuša mii šaddaduvvui dan biraseatnamis. ₄₉Josef vuorkkui nu ollu gortni ahte dat lei eatnat dego meara sáttočalmmit. Maŋimus šadde heaitit doallamis das logu, danin go gortni eatnatvuohta ii lean šat mihtideames.

₅₀Ovdal vuosttaš nealgejagi Josefii riegádedje guokte bártni geaid eadni lei Asenat, Ona báhpa Poti Fera nieida. ₅₁Vuosttašriegádeaddjásis Josef bijai namman Manasse ja dajai: “Ipmil lea diktán mu vajáldahttit visot váivvi ja áhččán viesu.” ₅₂Nuppi bárdnái son bijai namman Efraim ja dajai: “Ipmil lea dahkan mu šattolažžan vártnuhisvuohtan eatnamis.”

₅₃Go Egypta čieža valljugasvuođa jagi ledje nohkan, ₅₄de álge čieža nealgejagi, nugo Josef lei dadjan. Buot eatnamiidda šattai nealgi, muhto oppa Egyptas lei borramuš. ₅₅Go Egypta gillágođii nealggi ja álbmot čuorvvui faraos láibbi, dalle farao dajai egyptalaččaide: “Mannet Josefa lusa ja dahket nugo son gohčču.” ₅₆Go nealgi lei juo oppa eatnamis, de Josef rabastii buot gordnevuorkkáid ja vuvddii gortni egyptalaččaide. Nealgi lei Egyptas garas. ₅₇Buot eatnamiin olbmot bohte Egyptii Josefa lusa oastit gortni, danin go buot eatnamiin nealgi lei garas.