1. Mosesgirji 43

₁Nealgi eatnamis lei garas. ₂Go sii ledje loaktán gortni maid ledje buktán Egyptas, de Jakob dajai bártniidasas: “Vulget fas oastit midjiide veaháš borramuša.” ₃Juda vástidii: “Dat olmmái dajai midjiide hui čielgasit ahte mii eat oaččo boahtit su ovdii jos min viellja ii leat minguin. ₄Jos don suovat su vuolgit minguin, de mii vuolgit oastit dutnje borramuša, ₅muhto jos it luoitte su min fárrui, de mii eat vuolgge. Dasgo dat olmmái dajai midjiide: Dii ehpet oaččo boahtit mu ovdii jos din viellja ii leat dinguin.” ₆Dalle Israel dajai: “Manne dii muitaleiddet sutnje ahte dis lea vel okta viellja?” ₇Sii vástidedje: “Dat olmmái jearahii dárkilit min ja min soga birra, ja son jearai: Velágo din áhčči eallá? Leago dis eará viellja? Mii muitaleimmet sutnje dan maid son jearai. Mas mii sáhtiimet diehtit ahte son áiggui gohččut min buktit dohko Benjamina?” ₈Juda dajai áhččásis Israelii: “Bija bártni mu mielde, de mii vuolgit dohko, vai mii buohkat, mii ja min áhkát ja mánát, bisošeimmet heakkas eatge jáme. ₉Mun manan dáhkádussii su ovddas, don oaččut gáibidit su mu gieđas. Jos mun in buvtte su ruoktot du lusa ja bija su du muođuid ovdii, de mun lean sivalaš du ovddas buot beivviidan. ₁₀Jos mii eat livčče ájahallan ná guhká, de mii livččiimet guovtte geardde juo geargan fitnat doppe.”

₁₁Dalle sin áhčči Israel dajai: “Jos juo ii leat eará ráđđi, de dahket ná: Váldet dán eatnama buoremus šattuin seahkaidasadet ja dolvot dan olbmái attáldahkan: veaháš balsama ja honnega, suovvasiid ja myrra, pistášanihtiid ja mandeliid. ₁₂Váldet mielde vel beali eambbo silbba, vai beassabehtet máhcahit dan silbba mii lei boahtán din seahkaide; dat sáhttá leat boahtán seahkaide vahágis. ₁₃Váldet dasto mielde vieljadet ja mannet fas dan olbmá lusa. ₁₄Vare Buotveagalaš Ipmil veahkehivččii din, vai dat olmmái livččii didjiide váibmoláđis ja luoittášii Benjamina ja nuppi vielja máhccat dinguin. Ja jos mun massán mánáidan, de gevvos dasto nu.”

₁₅Vieljažat čohkkejedje attáldagaideaset, válde mielde guovttegeardásaš meari silbba ja vulge Egyptii, ja Benjamin lei sin mielde. Doppe sii loaiddastedje Josefa ovdii. ₁₆Go Josef oinnii sin mielde Benjamina, de son dajai dállodoallásis: “Doalvvo dáid olbmáid mu vissui, váldde njuovvanoami ja ráhkat dan, dasgo sii borret mállásiid muinna.” ₁₇Olmmái dagai nugo Josef lei gohččon ja doalvvui sin Josefa vissui. ₁₈Muhto vieljažat balle go sin ledje doalvumin Josefa vissui, ja sii dadje: “Min leat várra doalvumin deike dan silbba dihte mii ovddit háve lei boahtán min seahkaide. Dál sii várra áigot fallehit min, váldit min šlávvan ja rivvet mis áseniid.” ₁₉Viesu uvssa ovddas sii manne Josefa dállodoalli lusa ja dadje sutnje: ₂₀“Gula min, hearrá! Mii finaimet dáppe juo oktii oastimin gortni, ₂₁ja go joavddaimet idjadansadjái ja rabasteimmet seahkaideamet, de juohkehaš mis gávnnai iežas silbba bajimusas seahkas. Dan mii leat dál buktán ruoktot, ₂₂ja mis lea vel eará silba vai beassat oastit gortni. Mii eat dieđe gii lei bidjan silbba min seahkaide.” ₂₃Dállodoalli vástidii: “Allet bala! Din Ipmil ja din áhči Ipmil lea bidjan din seahkaide dávvira. Din silbba mun lean ožžon.” Ja son buvttii Simeona sin lusa.

₂₄Dasto olmmái doalvvui sin Josefa vissui, buvttii sidjiide čázi vai sii besse bassat julggiid, ja sin áseniidda fuođđara. ₂₅Go sii vurde Josefa boahtit gaskabeaivvi, de sii lágidedje attáldagaideaset gárvvisin, danin go sii ledje gullan ahte galge boradit doppe.

₂₆Go Josef bođii vissui, de sii dolvo sutnje attáldagaid ja gopmirdedje su ovdii eatnamii. ₂₇Josef dearvvahii sin ja jearai: “Mo veadjá din boares áhčči, gean birra sártnuidet munnje? Velágo son eallá?” ₂₈Sii vástidedje: “Min áhčči, du bálvaleaddji, eallá ain. Son veadjá bures.” Ja sii gopmirdedje eatnamii su ovdii. ₂₉Go Josef áiccai Benjamina, eatnis bártni, de son jearai: “Leago dát din nuoramus viellja gean birra dii sártnuidet munnje?” Dasto son dajai: “Ipmil lehkos dutnje árbmugas, bártnážan!” ₃₀Dasto Josef doamai das eret, dasgo su váibmu njuorai sakka go son oinnii vieljas Benjamina, ja son čierostuvai. Son manai siskkit latnjii ja čierui doppe.

₃₁Go son lei bassan čalmmiid, de son máhcai, dagai iežas nanusin ja dajai: “Buktet borramuša.” ₃₂Ja borramuš buktojuvvui sierra sutnje, sierra vieljažiidda ja sierra egyptalaččaide geat boradedje su luhtte. Egyptalaččat oainnat eai oaččo boradit hebrealaččaiguin, dasgo dat lea egyptalaččaide fastivuohta. ₃₃Vieljažat biddjojuvvojedje čohkkát buohtalagaid Josefiin, vuosttašriegádeaddji bajimussii ja nuoramus vuolimussii. Ovddošemiin vieljažat vilpo guhtet guoibmáseaset. ₃₄Go Josef dasto guossohii sin iežas beavddi biepmuin, de son divttii Benjamina oažžut vihtta dan mađe go ovttage eará. Ja sii juhke buohkat ovttas ja juhkaluvve.