Jesaja 43

₁Dál cealká Hearrá,

son guhte sivdnidii du, Jakob,

son guhte hábmii du, Israel:

Ale bala, mun lean lonistan du,

mun lean addán dutnje du nama,

don leat mu.

₂Go don manat čáziid čađa,

de mun lean duinna,

rávnnjit eai heavat du.

Go don manat dola čađa,

de dat ii guorbat du

iige dollanjuovčča boaldde du.

₃Mun lean Hearrá, du Ipmil.

Mun, Israela Bassi, beasttán du.

Mun attán Egypta lonisin du ovddas,

Kuša ja Seba du sadjái.

₄Don leat munnje mávssolaš,

mun gudnejahtán ja ráhkistan du.

Dan dihte mun attán olbmuid du sadjái,

álbmogiid máksun du heakka ovddas.

₅Ale bala, munhan lean duinna.

Mun vieččan du náli nuortan,

mun čohkken din buohkaid oarjin.

₆Davvái mun cealkkán: “Atte sin munnje!”

ja lullái: “Luoitte sin vuolgit!”

Buktet mu bártniid guhkkin,

mu nieiddaid eatnama ravddain,

₇buohkaid geat namahuvvojit mu namain,

buohkaid geaid mun lean sivdnidan,

dahkan ja hábmen iežan gudnin.

₈Rávkka ovdan álbmoga

mii lea čalmmeheapme

vaikko das leat čalmmit,

mii lea bealjeheapme,

vaikko das leat bealjit.

₉Buot álbmogat čoahkkanit,

olbmuid čearddat bohtet čoahkkái.

Guhtemuš dain sáhtii gulahit dákkáriid

ja muitalit midjiide dan

mii dáhpáhuvai ovdal?

Buktoset sii ovdan duođašteddjiideaset,

čájehehkoset ahte leat vuoigadis,

nu ahte earát gulašedje ja dajašedje:

“Duohta gal lea.”

₁₀Muhto mu duođašteaddjit,

cealká Hearrá, lehpet dii

– Israel, don gean mun lean válljen

iežan bálvaleaddjin –

ja dii galgabehtet dovdat mu

ja oskut munnje,

ipmirdit ahte mun lean Ipmil.

Mu ovdal ii leat leamaš ipmil,

iige boađe mu maŋŋil.

₁₁Mun, mun lean Hearrá,

earret mu ii leat beasti.

₁₂Mun lean sárdnon,

mun lean beastán,

mun lean almmuhan didjiide

iežan dáhtu,

mun ieš, ii oktage amas ipmil.

Dii lehpet mu duođašteaddjit,

cealká Hearrá.

Mun lean Ipmil,

₁₃ja maiddái boahtteáiggis

mun lean seammá.

Ii oktage sáhte gaikkihit maidege

mu gieđas.

Gii sáhttá dahkat duššin mu daguid?

₁₄Ná cealká Hearrá, din lonisteaddji,

Israela Bassi:

Maid mun dagan Babylonii,

dan mun dagan din dihte.

Mun cuvken buot dan poarttaid smarttiid,

ja luoimmasin rivdet

kaldealaččaid illučuorvasat.

₁₅Mun lean Hearrá, din Bassi Ipmil,

Israela sivdnideaddji, din gonagas!

₁₆Ná cealká Hearrá,

son gii dagai geainnu áhpái,

bálgá veagalaš čáziid čađa,

₁₇son gii divttii heasttaid ja vovnnaid

ja gievrras soahteolbmáid lihkkasit mátkái

– čiekŋalasas sii dál njaŋgájit

eaige šat čuožžil,

dego lámppá jáddi dollanjuovčča

sii jávke –

ná son cealká:

₁₈Allet jurddaš dološ dáhpáhusaid,

allet smiehta vássán áiggiid!

₁₉Dál mun dagan juoidá ođđasiid.

Dat lea juo bohciideamen ovdan,

ehpetgo dii fuomáš?

Mun dagan geainnu meahccái,

eanuid ávdin eatnamii.

₂₀Meahcieallitge gudnejahttet mu,

šakálat ja struhcat,

danne go mun lean buktán čázi

čázehis meahccái,

jogaid jakŋa eatnamii,

vai mu álbmot maid mun lean válljen,

beassá juhkat.

₂₁Álbmot maid mun lean

ráhkadan alccesan,

lávlu mu rámádusa.

₂₂Don it čurvon mu, Jakob,

don it rahčan mu dihte, Israel.

₂₃It don leat buktán munnje

sávzzaid boaldinoaffarin

itge gudnejahttán mu njuovvanoaffariiguin.

Mun in váivvidan du borramušoaffariin

inge váibadan du suovvasiin.

₂₄It don leat oastán munnje kalmusa,

it gallehan mu

njuovvanoaffariiddát buiddiin.

Don baicce leat givssidan mu suttuidatguin,

váivvidan mu vearredaguidatguin.

₂₅Muhto mun, mun sihkun

du vearredaguid iežan dihte

inge šat muitte du suttuid.

₂₆Váidde mu, lágasteahkku!

Bija áššát ovdan, vai oaččut vuoigatvuođa!

₂₇Juo du máddu suddudii,

du njunušolbmát hilgo mu.

₂₈Dan dihte mun vuolidin

du bassi oaivámuččaid,

vihahin Jakoba duššadeapmái,

dikten Israela hiddjiduvvot.