Lukas 17

₁Jesus celkkii máhttájeddjiidasas: “Vearránusat gal fertejit boahtit, muhto vuoi dan gean bokte dat bohtet! ₂Buoret livččii dan olbmui ahte son bálkestuvvošii merrii millogeađgi čeabehis, go ahte son jorralahttá ovttage dáin uhcahaččain. ₃Váruhehket!

Jos du viellja sudduda, de cuiggot su, ja jos son gáhtá, de atte sutnje ándagassii. ₄Vaikko son suddudivččii du vuostá čieža geardde seammá beaivvi ja boahtá čieža geardde du lusa dadjat: ‘Mun gáđan’, de atte sutnje ándagassii.”

₅Apostalat dadje Hearrái: “Atte midjiide nannoset oskku.” ₆Hearrá vástidii: “Jos dis livččii osku juobe sennetsiepmana vearddege, de dii sáhtášeiddet dadjat dán meahccefiikonmurrii: ‘Badján eatnamis oktan ruohttasiiguin ja cegge iežat merrii’, ja dat jeagadivččii din.

₇Jos dis lea bálvaleaddji jorgumin eatnama dahje guođoheamen sávzzaid, de ehpet suige dii daja sutnje dalle go son máhccá ruoktot: ‘Boađe beavdái, de beasat dállán boradit.’ ₈Dii baicca dadjabehtet: ‘Ráhkat munnje mállásiid, boahkánastte iežat ja bálval mu dan botta go mun boran ja jugan. Dasto dongis beasat borrat ja juhkat.’ ₉Ii bálvaleaddji oaččo giitosa das ahte dahká dan maid son galgá dahkat. ₁₀Nugis dii, go lehpet dahkan visot maid galgabehtet dahkat, dadjet: ‘Mii leat ávkkehis bálvaleaddjit. Mii leat dahkan dušše dan maid leimmet geatnegasat dahkat.’”

₁₁Go Jesus lei vádjoleamen Jerusalema guvlui, de son manai Samaria ja Galilea rádjeguovlluid bokte. ₁₂Go son lei mannamin muhtun gillái, de su ovddal bohte logi spihtálačča. Sii bisánedje dobbelii ₁₃ja čurvo: “Jesus, oahpaheaddji, árpmit min!” ₁₄Go Jesus oinnii sin, de son celkkii: “Mannet čájehit iežadet báhpaide.” Go sii ledje mannamin, de sii buhtásmuvve. ₁₅Go okta sis oinnii ahte lea buorránan, de son jorggihii ruoktot. Son máinnui Ipmila alla jienain, ₁₆luoitádii Jesusa julggiid ovdii ja giitalii su. Dát olmmái lei samarialaš. ₁₇Jesus jearai: “Eaigo buot logis buhtásmuvvan? Gos dat ovccis leat? ₁₈Dušše dát vieris olmmošgo máhcai rámidit Ipmila?” ₁₉Ja son celkkii olbmái: “Čuožžil ja mana. Du osku lea beastán du.”

₂₀Go farisealaččat jerre Jesusis goas Ipmila riika boahtá, de son vástidii: “Ii Ipmila riika boađe nu ahte olmmoš sáhttá dárkot dan boahtima. ₂₁Ii oktage sáhte dadjat: Dat lea dáppe, dahje: Dat lea duoppe. Dasgo Ipmila riika lea din siste.”

₂₂Máhttájeddjiidasas son celkkii:

“Boahtá áigi goas dii áibbašehpet oaidnit ovtta Olbmobártni beivviin, muhto ehpet beasa oaidnit. ₂₃Olbmot dadjet dalle didjiide: ‘Son lea duoppe’, ja: ‘Son lea dáppe’, muhto allet vuolgge gosage, allet doama sin maŋŋái. ₂₄Nugo álddagas leađggeha ja čuvge almmi ravddas ravdii, nu Olbmobárdnige lea iežas almmustuvvama beaivvi. ₂₅Muhto son ferte vuos gillát ollu, ja dát buolva hilgu su.

₂₆Nugo lei Noa beivviid, nu lea maiddái Olbmobártni beivviid. ₂₇Olbmot borre ja juhke, náitaladde ja náitojuvvojedje gitta dan beaivvi rádjái go Noa manai árkii, ja dulvi bođii ja heavahii sin buohkaid. ₂₈Dahje nugo lei Lota beivviid: Olbmot borre ja juhke, oste ja vuvde, gilve ja huksejedje. ₂₉Muhto dan beaivvi go Lot vulggii Sodomas, de almmis rišai dolla ja rišša ja heavahii sin buohkaid. ₃₀Seammá láhkái geavvá dan beaivvi go Olbmobárdni almmustuvvá.

₃₁Jos muhtun dan beaivvi lea dáhki alde ja sus leat biergasat viesus, de son ii oaččo mannat viežžat daid, ja jos muhtun lea bealddus, de son ii oaččo máhccat ruoktot. ₃₂Muitet Lota áhká! ₃₃Gii viggá gádjut eallimis, dat massá dan, muhto gii dan massá, dat gádju dan. ₃₄Mun cealkkán didjiide: Dan ija guokte olbmo leat ovtta seaŋggas; nubbi váldojuvvo, nubbi guđđojuvvo. ₃₅Guokte nissona leat málemin searválagaid; nubbi váldojuvvo, nubbi guđđojuvvo. ₃₆Guokte olbmá leat bealddus; nubbi váldojuvvo ja nubbi guđđojuvvo.”

₃₇Máhttájeaddjit jerre sus: “Gos, Hearrá?” Son vástidii: “Gos rábbi lea, dasa čoagganit goaskimat.”