Lukas 24

₁Vuosttaš beaivvi sabbaha maŋŋil nissonat juo árrat iđedis manne hávddi lusa ja válde mielde njálggahájat vuoidasiid maid ledje ráhkadan. ₂Sii oidne ahte geađgi lei fierahuvvon eret hávdenjálmmis. ₃Go sii manne sisa, de sii eai gávdnan Hearrá Jesusa rupmaša, ₄eaige sii diehtán maid jurddašit. Fáhkkestaga sin ovddas čužžo guokte olbmá šerres biktasat gárvun. ₅Nissonat suorganedje ja sojaldahtte muođuid eatnama guvlui. Muhto olbmát dajaiga sidjiide: “Manne dii ohcabehtet jábmiid gaskkas su guhte eallá? ₆Ii son leat dás, son lea čuožžilan jábmiid luhtte. Muitet maid son sártnui didjiide go ain lei Galileas: ₇‘Olbmobárdni addojuvvo suttolaš olbmuid gihtii ja russiinávlejuvvo, muhto goalmmát beaivvi son čuožžila jábmiid luhtte.’” ₈Dalle sii muitájedje maid Jesus lei sárdnon.

₉Go nissonat ledje máhccan hávddi luhtte, de sii muitaledje visot dan oktanuppelohkái apostalii ja buot earrásiidda. ₁₀Nissonat ledje Maria Magdalena, Johanna ja Jakoba eadni Maria, ja singuin ledje maid eará nissonat. Sii muitaledje visot apostaliidda, ₁₁muhto apostalat atne nissoniid sániid joavdelas sáhkan eaige jáhkkán sidjiide. ₁₂Peter vulggii goit viega hávddi lusa. Go son guovllai dan sisa, de son oinnii dušše liinniid, ja son vulggii eret ja imaštalai mii lei dáhpáhuvvan.

₁₃Seammá beaivvi guokte máhttájeaddji ledje mannamin gillái man namma lea Emmaus. Dohko olmmoš vázzá Jerusalemis guovtte diimmus. ₁₄Soai sártnodeigga buot das mii lei dáhpáhuvvan. ₁₅Go soai leigga sártnodeamen ja árvaladdamin dán birra, de Jesus bođii ieš ja váccii sudnuin. ₁₆Soai eaba goit dovdan su, danin go sudno čalmmit ledje dahppojuvvon. ₁₇Jesus jearai sudnos: “Mat ságaid dat leat maid doai sárdnubeahtti goabbat guimmiineatte?” Soai orusteigga morašlažžan, ₁₈ja nubbi gean namma lei Kleopas, vástidii: “Don dáiddát leat Jerusalemis áidna vierroolmmoš gii it dieđe, mii doppe lea dáhpáhuvvan dáid beivviid.” ₁₉Jesus jearai: “Mii lea dáhpáhuvvan?” Soai vástideigga: “Dat mii dáhpáhuvai nasaretlaš Jesusii. Son lei profehta, fámolaš sániin ja daguin Ipmila ja oppa álbmoga ovddas. ₂₀Min bajimusbáhpat ja oaivámuččat adde su dubmejuvvot jápmimii ja russiinávlejedje su. ₂₁Muhto mii doaivvuimet ahte son livččii dat gii lonista Israela. Iige das galle. Dál lea juo goalmmát beaivi dan rájes go dat dáhpáhuvai, ₂₂ja dál soames nissonat min searvvis leat suorggahan min. Árrat otná iđida sii manne hávddi luhtte, ₂₃muhto eai gávdnan su rupmaša. Go sii ledje boahtán doppe, de sii muitaledje ahte ledje oainnáhusas oaidnán eŋgeliid geat celke ahte Jesus eallá. ₂₄Dalle soapmásat mis manne hávddi lusa ja gávnnahedje ahte áššit ledje nugo nissonat ledje muitalan. Muhto Jesusa sii eai oaidnán.”

₂₅Dalle Jesus celkkii sudnuide: “Man jierpmeheamit dii lehpet, ja nu hilljánat oskut buot dan maid profehtat leat cealkán. ₂₆Iigo Messias galgan gillát dan ja mannat hearvásvuohtasis.” ₂₇Ja son čilgegođii sudnuide Mosesa ja buot profehtaid rájes mii su birra lea čállojuvvon buot čállagiin.

₂₈Sii ledje lahkaneamen dan gillái gosa máhttájeaddji guovttos leigga mannamin. Jesus lei mahkáš mannamin guhkkeliidda, ₂₉muhto soai nággiiga su sakka ja dajaiga: “Oro munno luhtte! Lea juo eahketbeallái ja beaivi vuollána.” Dalle son manai sisa ja orui sudno luhtte. ₃₀Go son dasto lei boradeamen sudnuin, de son válddii láibbi, giittii Ipmila, doadjalii láibbi ja attii sudnuide. ₃₁Dalle sudno čalmmit rahpasedje ja soai dovddaiga su. Muhto seammás son jávkkai sudno oidnosis. ₃₂Soai árvaleigga goabbat guimmiineaskka: “Almma munno váibmu lei buollimin, go son mátkkis sártnui munnuide ja čilgii čállagiid?” ₃₃Soai vulggiiga dallánaga ja máhcaiga Jerusalemii. Doppe ledje čoahkis oktanuppelohkái máhttájeaddji ja buot earát, ₃₄ja sii dadje: “Hearrá lea duođaid čuožžilan jábmiid luhtte! Son lea almmustuvvan Simonii.” ₃₅Dát guovttes muitaleigga mii lei dáhpáhuvvan mátkkis ja mo soai leigga dovdan Jesusa, go son doadjalii láibbi.

₃₆Go sii ledje ain sárdnumin, de fáhkkestaga Jesus ieš čuoččui sin gaskkas ja celkkii: “Ráfi didjiide.” ₃₇Sii suorganedje ja balle, dasgo sii gádde ahte sii oidne vuoiŋŋa. ₃₈Muhto Jesus celkkii sidjiide: “Manne dii suorganehpet? Manne din millii badjánit eahpádusat? ₃₉Gehččet mu gieđaid ja mu julggiid: Mun ieš dás lean. Guldalehket mu ja gehččet. Ii vuoiŋŋas leat oažži eaige dávttit, nugo oaidnibehtet mus leat.” ₄₀Ja son čájehii sidjiide iežas gieđaid ja julggiid. ₄₁Sii eai dattetge velá diehtán maid oskut, sii ledje nu ilus ja ipmašis. Dalle Jesus jearai: “Leago dis dáppe mihkkege maid borrat?” ₄₂Sii adde sutnje basson guollebihtá ₄₃ja oidne go son válddii dan ja borai.

₄₄Jesus celkkii sidjiide: “Dán mun oaivvildin go sártnodin dinguin dalle go ain ledjen dinguin. Buot dat fertii ollašuvvat mii mu birra lea čállojuvvon Mosesa lágas, profehtaid girjjiin ja sálmmain.” ₄₅De son rabastii sin jierpmi áddet čállagiid. ₄₆Son celkkii sidjiide: “Ná lea čállojuvvon: Messias fertii gillát ja goalmmát beaivvi čuožžilit jábmiid luhtte, ₄₇ja buot álbmogiidda, Jerusalema rájes, galgá sárdniduvvot jorgaleapmi ja suttuid ándagassii addojupmi. ₄₈Dii lehpet dán duođašteaddjit. ₄₉Mun vuolggahan didjiide dan maid mu Áhčči lea lohpidan. Orrot dán gávpogis dassážii go gárvvuhuvvobehtet fámuin allagasas.”

₅₀Jesus doalvvui máhttájeddjiid gávpoga olggobeallái lahka Betania, ja doppe son loktii gieđaid ja buressivdnidii sin. ₅₁Buressivdnidettiin son earránii sis, ja son váldojuvvui bajás albmái. ₅₂Sii luoitádedje eatnamii ja gudnejahtte su, ja de sii máhcce illudemiin Jerusalemii. ₅₃Sii ledje oktilassii tempelis ja rámidedje Ipmila.