Matteus 23

₁De Jesus sártnui olbmuide ja iežas máhttájeddjiide:

₂“Mosesa stuolus čohkkájit čálaoahppavaččat ja farisealaččat. ₃Dahket ja dollet dan dihte buot dan maid sii oahpahit didjiide. Muhto allet daga sin daguid mielde, dasgo sii eai daga iežaset sániid mielde. ₄Sii gurpet lossa ja váivves nođiid ja bidjet olbmuid daid guoddit, muhto ieža sii eai dáhto lihkastahttit daid eai suorbmagežiinge. ₅Buot maid sii dahket, sii dahket dušše danne vai olbmot oidnet sin. Sii háhket alcceseaset govda rohkosbuddestagaid ja stuorra bivttasdihpiid. ₆Sii liikojit čohkkát boaššumusas go leat guossis ja buoremus sajiin synagogain, ₇ja sii dáhttot ahte olbmot dearvvahit sin márkanšiljuin ja gohčodit sin rabbin.

₈Allet dii suova gohčodit iežadet rabbin, danne go dis lea dušše okta oahpaheaddji ja dii lehpet buohkat vieljažat. ₉Alletge gohčot áhččin ovttage dáppe eatnama alde, danne go dušše okta lea din Áhčči, son gii lea almmis. ₁₀Alletge suova gohčodit iežadet oahpaheaddjin, danne go dis lea dušše okta oahpaheaddji, Kristus. ₁₁Dat gii din gaskkas lea stuorimus, galgá leat earáid bálvaleaddji. ₁₂Gii alida iežas, dat vuoliduvvo, ja gii vuolida iežas, dat aliduvvo.

₁₃Vuoi din, čáloahppavaččat ja farisealaččat, dii guoktilaččat! Dii dahppabehtet almmi riikka uvssaid olbmuid ovddas. Ieža dii ehpet mana sisa ehpetge luoitte velá daidge geat dáhtošedje mannat. ₁₄Vuoi din, čáloahppavaččat ja farisealaččat, dii guoktilaččat! Dii loaktibehtet leaskkaid dáluid ja lohkabehtet guhkes rohkosiid dušše hámi dihte. Dađe garraseabbo lea din duopmu.

₁₅Vuoi din, čáloahppavaččat ja farisealaččat, dii guoktilaččat! Dii johtibehtet eatnamiid ja čáziid mielde vai oažžubehtet ovtta áidna proselyhta, ja go son lea čuovvulan din, de dii dahkabehtet su helveha mánnán, guovtte geardái bahábun go dii ieža.

₁₆Vuoi din, dii čuovggahis oahpisteaddjit! Dii dadjabehtet: Jos guhtege vuordnu tempela bokte, de dat ii leat mihkkege, muhto jos guhtege vuordnu tempela golliid bokte, de son lea geatnegas doallat vális. ₁₇Dii čalmmehis doavkkit! Goabbá lea stuorit, golli vai tempel mii basuha golli? ₁₈Dii dadjabehtet: Jos guhtege vuordnu áltára bokte, de dat ii leat mihkkege, muhto jos guhtege vuordnu attáldaga bokte mii lea áltára alde, de son lea geatnegas doallat vális. ₁₉Dii čalmmeheamit! Goabbá lea stuorit, attáldat vai áltár mii dan attáldaga basuha? ₂₀Dat gii vuordnu áltára bokte, vuordnu sihke áltára bokte ja buot dan bokte mii lea áltára alde. ₂₁Dat gii vuordnu tempela bokte, vuordnu sihke tempela ja su bokte gean ássansadji dat lea. ₂₂Ja dat gii vuordnu almmi bokte, vuordnu Ipmila truvnnu bokte ja su bokte gii das čohkká.

₂₃Vuoi din, čáloahppavaččat ja farisealaččat, dii guoktilaččat! Dii addibehtet logádasaid minttas, dillas ja kumminis, muhto ehpet daga dan mii lágas lea deaŧaleamos: vuoigatvuođa, váibmoláđisvuođa ja oskkáldasvuođa. Dáid dii galggašeiddet dahkat ehpetge vajáldahttit daid earáidge. ₂₄Dii čalmmehis oahpisteaddjit! Dii sillebehtet eret čuoikka, muhto njiellabehtet kamela!

₂₅Vuoi din, čáloahppavaččat ja farisealaččat, dii guoktilaččat! Dii buhtistehpet geara ja gári olggobeale, muhto siskkobealde daid dievva lea rievádus ja mearihisvuohta. ₂₆Don čalmmehis farisealaš, buhtis vuos geara siskkobeale, de maiddái dan olggobealle šaddá buhtisin.

₂₇Vuoi din, čáloahppavaččat ja farisealaččat, dii guoktilaččat! Dii lehpet dego vielgadin kálkejuvvon hávddit. Olggul dat gal orrot čáppisin, muhto siskkil daid dievva leat jábmiid dávttit ja juohkelágán buhtismeahttunvuohta. ₂₈Nu maiddái dii orrubehtet vanhurskkisin olgguldasat, olbmuid čalmmiin, muhto siskkil din dievva lea guoktiluššan ja verrodat.

₂₉Vuoi din, čáloahppavaččat ja farisealaččat, dii guoktilaččat! Dii huksebehtet muitomearkkaid profehtaid hávddiid ala, čiŋahehpet vanhurskásiid hávdegeđggiid ₃₀ja dadjabehtet: Jos mii livččiimet eallán áhčiideamet áigge, de mii eat livčče leamaš oasálaččat singuin profehtaid varrii. ₃₁Nu dii duođaštehpet ieža ahte lehpet daid mánát geat godde profehtaid. ₃₂Dahket áinnas áhčiideattet láhkái, dassá go mihttu lea dievvan. ₃₃Dii gearbmašat, dii gearbmaščivggat! Mo dii sáhttibehtet vealtat dubmejuvvomis helvehii?

₃₄Dan dihte mun vuolggahan din lusa profehtaid, viisáid ja čáloahppavaččaid. Muhtumiid sis dii goddibehtet ja russiinávlebehtet, earáidgis dii spihččebehtet synagogaineattet ja doarridehpet gávpogis gávpogii. ₃₅Nu dii šaddabehtet sivalažžan visot vigihis varrii mii lea golggahuvvon eatnama alde vanhurskkis Abela vara rájes gitta Sakarja, Berekja bártni, vara rádjái, gean dii gottiidet tempela ja áltára gaskii. ₃₆Duođaid, mun cealkkán didjiide: Dát buolva gártá vástidit buot dáid ovddas.

₃₇Jerusalem, Jerusalem! Don gottát profehtaid ja geađgádat daid geat leat vuolggahuvvon du lusa. Man dávjá mun lean dáhtton čohkket du mánáid dego vuonccis čohkke čivggaidis soajáidis vuollái, muhto dii ehpet leat dáhtton boahtit. ₃₈Gullet nappo: Din tempel hilgojuvvo ja báhcá ávdimin. ₃₉Dasgo mun cealkkán didjiide: Dii ehpet šat oainne mu ovdal go dadjabehtet: Buressivdniduvvon lehkos son guhte boahtá Hearrá nammii!”