Matteus 24

₁Go Jesus lei boahtán olggos tempelis ja lei vuolgaleamen, de su máhttájeaddjit bohte su lusa ja čujuhedje tempela viesuide. ₂Muhto Jesus celkkii sidjiide: “Oaidnibehtetgo buot dán? Duođaid, mun cealkkán didjiide: Buot gaikojuvvo eatnamii, dása ii báze geađgi geađggi ala.”

₃Go Jesus de lei čohkkámin Oljováris eaige das lean earát, de máhttájeaddjit bohte su lusa ja dadje: “Muital midjiide goas dat dáhpáhuvvá. Ja mii lea du boahtima ja dán máilmmi loahpa mearka?”

₄Jesus vástidii: “Váruhehket, vai ii oktage čádjit din. ₅Eatnagat bohtet mu namas ja dadjet: ‘Mun lean Messias’, ja sii čádjidahttet olusiid. ₆Dii gullabehtet soahtešláma ja soahteságaid, muhto allet dain suorgan. Nu ferte dáhpáhuvvat, muhto loahppa ii leat velá. ₇Álbmot čuožžila álbmoga vuostá ja riika riikka vuostá, ja ollu báikkiin lea nealgi ja eanandoarggástusat. ₈Buot dát leat ávttaid álgu.

₉De sii áŧestit din ja goddet din, ja buot álbmogat vašuhit din mu nama dihte. ₁₀Dalle eatnagat vearránit, ja sii behttet ja vašuhit guhtet guimmiideaset. ₁₁Ollu vearreprofehtat čuožžilit, ja sii fillejit eatnagiid. ₁₂Ja go lágahisvuohta lassána, de čoasku eatnagiid ráhkisvuohta. ₁₃Muhto gii bissu nanusin gitta loahpa rádjái, dat bestojuvvo. ₁₄Dán riikka evangelium sárdniduvvo miehtá oppa máilmmi duođaštussan buot álbmogiidda, ja de boahtá loahppa.

₁₅Go dii oaidnibehtet bassi sajis čuožžumin bilideaddji fastivuođa man birra profehta Daniel lea sárdnon – váldos lohkki dán vuhtii! – ₁₆de dalle fertejit buohkat geat leat Judeas, báhtarit váriide. ₁₇Dat gii lea dáhki alde, ii oaččo mannat viežžat maidege viesustis, ₁₈iige dat gii lea bealddus, oaččo máhccat viežžat iežas oalgebiktasa. ₁₉Vuoi áhpehemiid ja njamaheddjiid daid beivviid! ₂₀Rohkadallet, amadet šaddat báhtarit dálvet dahje sabbahin. ₂₁Dalle áŧestus lea nu stuoris ahte dakkár ii leat leamaš máilmmi álggu rájes gitta otnáža rádjái iige šatta šat goassege. ₂₂Jos dat áigi ii oaniduvvoše, de ii oktage olmmoš bestojuvvo. Muhto válljejuvvon olbmuid dihte diet áigi oaniduvvo.

₂₃Jos dalle muhtin dadjá didjiide: Dáppe lea Messias, dahje: Messias lea duoppe, de allet jáhke. ₂₄Vearremessiasat ja vearreprofehtat čuožžilit, ja sii dahket stuorra mearkkaid ja oavdudaguid, nu ahte sii čádjidahttet velá válljejuvvon olbmuidge, juos vejolaš. ₂₅Dál mun lean cealkán dan didjiide juo ovdal. ₂₆Jos nappo didjiide daddjojuvvo: ‘Son lea meahcis’, de allet vuolgge dohko, dahje: ‘Son lea gámmáris’, de allet jáhke. ₂₇Nugo álddagas šleađggáda nuortan ja čuvge almmi gitta oarjji rádjái, nu lea dalle go Olbmobárdni boahtá. ₂₈Gos rábbi lea, dasa čoagganit ráhtogoaskimat.

₂₉Muhto dallánaga daid beivviid áŧestusaid maŋŋil beaivváš sevnnjoda iige mánnu báitte. Násttit gahččet vuolás almmis ja almmi veagat lihkahuvvojit. ₃₀Dalle Olbmobártni mearka ihtá albmái. Buot máilmmi čearddat luibmet go oidnet Olbmobártni boahtimin almmi balvvaid siste stuorra fámuin ja hearvásvuođain. ₃₁Go stuorra báson čuodjá, de son vuolggaha eŋgeliiddis njealji almmiguvlui čohkket daid geaid son lea válljen, nuppi almmiravddas gitta nuppi almmiravdii.

₃₂Ohppet veardádusa fiikonmuoras: Go dan oavssit máihlot ja lasttat ihtigohtet, de dii diehtibehtet ahte geassi lea lahka. ₃₃Nu maiddái dii, go oaidnibehtet buot dáid dáhpáhuvvamin, de diehtibehtet ahte son lea lahka, uvssas čuožžumin. ₃₄Duođaid, mun cealkkán didjiide: Dát buolva ii jávkka ovdal go buot dát dáhpáhuvvet. ₃₅Albmi ja eanan duššet, muhto mu sánit eai goassege dušša. ₃₆Muhto dan beaivvi ja bottu ii dieđe oktage, eai almmi eŋgelat iige Bárdni, muhto duššefal Áhčči. ₃₇Nugo lei Noa beivviid, nu lea maiddái dalle go Olbmobárdni boahtá. ₃₈Ovdal dulvvi olbmot borre ja juhke, náitaladde ja náite nieiddaideaset gitta dan beaivvi rádjái go Noa manai árkii. ₃₉Ii oktage váldán das vára, ovdal go dulvi bođii ja doalvvui sin buohkaid. Nu lea maiddái dalle go Olbmobárdni boahtá. ₄₀Dalle leat guokte olbmá bealddus: Nubbi váldojuvvo, nubbi guđđojuvvo. ₄₁Guokte nissona leat málemin milluin gortni: Nubbi váldojuvvo, nubbi guđđojuvvo. ₄₂Gohcet dan dihte, danne go dii ehpet dieđe guđe beaivvi din Hearrá boahtá. ₄₃Diihan áddebehtet ahte jos dáluisit dieđášii guđe idjagohcinvuorus suola boahtá, de son gozášii iige divttáše su gaikut vissosis. ₄₄Lehket nappo diige gárvásat, danne go Olbmobárdni boahtá dakkár bottus go dii uhcimusat lehpet vuordimin.

₄₅Gii dalle lea oskkáldas ja jierpmálaš bálvaleaddji gean su hearrá lea bidjan bálvaleddjiid ovdaolmmožin geahččat bearrái ahte buohkat ožžot borramuša rivttes áigái? ₄₆Ávdugas dat bálvaleaddji gean su hearrá gávdná dahkamin nie go máhccá! ₄₇Duođaid, mun cealkkán didjiide: Su háldui hearrá oskkilda oppa opmodagas. ₄₈Muhto jos bálvaleaddji lea bahá, de son jurddaša: ‘Mu hearrá ádjána boahtimis’, ₄₉ja riepmá cábmit bálvalanguimmiidis ja borrat ja juhkat juhkkiid searvvis, ₅₀de dan bálvaleaddji hearrá boahtá dan beaivvi maid son ii árvit ja dan bottu maid son ii dieđe, ₅₁ časká su jámas ja bidjá su seammá báikái go guoktilaččaid. Doppe čirrot ja gižahit bániid.