Matteus 25

₁Dalle almmiriika sáhttá veardiduvvot logiin nuorra nieiddain geat válde lámppáideaset ja vulge olggos irggi ovddal. ₂Viđas sis ledje jierpmeheamit ja viđas ledje jierpmálaččat. ₃Jierpmeheamit válde lámppáideaset, muhto eai oljju daidda. ₄Jierpmálaččat válde lámppáideaset ja vel oljolihtiid. ₅Go irgi ádjánii, de sii buohkat oađestuvvagohte ja nohkke.

₆Muhto gaskaija gullui čuorvvas: ‘Irgi boahtá! Mannet su ovddal!’ ₇Dalle buot moarsebiiggát morihedje ja gárvvistedje lámppáideaset. ₈Jierpmeheamit dadje jierpmálaččaide: ‘Addet midjiide veaháš oljju, min lámppát jáddet.’ ₉Muhto jierpmálaččat vástidedje: ‘Eat atte, ii leat doarvái alcceseamet ja vel didjiide. Mannet baicca oastit dain geat vuvdet oljju.’ ₁₀Muhto go sii ledje mannan oastit, de irgi bođii. Sii geat ledje ráhkkanan, manne suinna heajaide, ja uksa giddejuvvui. ₁₁Maŋŋil dat eará nieiddat bohte ja čurvo: ‘Hearrá, hearrá, rabas uvssa midjiide!’ ₁₂Muhto son vástidii sidjiide: ‘Duođaid, mun cealkkán didjiide: Mun in dovdda din.’ ₁₃Gohcet dan dihte, danne go dii ehpet dieđe beaivvi ehpetge diimmu.

₁₄Dalle geavvá ná: Olmmái lei fárremin eret eatnamis. Son rávkkai bálvaleddjiidis ja oskkildii sin háldui oppa opmodagas. ₁₅Oktii son attii vihtta taleantta, nubbái guokte ja goalmmádiigis ovtta, iešguhtiige su áhpiid mielde. De son fárrii eret eatnamis.

₁₆Dat gii lei ožžon vihtta taleantta, vulggii dallánaga gávppašit daiguin ja vuittii vihtta eará taleantta. ₁₇Nu maiddái dat gii lei ožžon guokte taleantta, vuittii guokte eará. ₁₈Muhto dat gii lei ožžon ovtta taleantta, rokkai eatnamii rokki ja čiegai dasa hearrás ruđa.

₁₉Guhkes áiggi geažes hearrá máhcai ja gáibidii bálvaleddjiin ruhtačilgehusa. ₂₀Dat gii lei ožžon vihtta taleantta, buvttii eará vihtta dan viđa lassin ja dajai: ‘Hearrá, don addet munnje vihtta taleantta. Geahča, mun lean dienidan daiguin vihtta eará.’ ₂₁Hearrá celkkii: ‘Buorre! Don leat buorre ja oskkáldas bálvaleaddji. Don leat leamaš oskkáldas uhccánaččas, mun bijan du hálddašit ollu. Boađe hearrát ávvudoaluide!’ ₂₂Maiddái dat gii lei ožžon guokte taleantta, bođii ja dajai: ‘Hearrá, don addet munnje guokte taleantta. Geahča, mun lean dienidan daiguin guokte eará.’ ₂₃Hearrá celkkii sutnje: ‘Buorre! Don leat buorre ja oskkáldas bálvaleaddji. Don leat leamaš oskkáldas uhccánaččas, mun bijan du hálddašit ollu. Boađe hearrát ávvudoaluide!’

₂₄De bođii dat gii lei ožžon dušše ovtta taleantta, ja dajai: ‘Hearrá, mun dihten du garra olmmájin. Don láddjet gosa it leat gilván, ja čohkket gosa it leat siepmana biđgen. ₂₅Mun ledjen balus ja čihken du taleantta eatnamii. Dá lea du oapmi.’ ₂₆Su hearrá dajai sutnje: ‘Don bahás ja láikkes bálvaleaddji! Don dihtet ahte mun láddjen maid in leat gilván, ja čohkken gosa in leat siepmana biđgen. ₂₇Dan dihte don livččet galgan doalvut mu ruđa báŋkui, vai mun máhcadettiinan livččen ožžon oapmán ruoktot oktan reanttuin. ₂₈Váldet danne sus taleantta ja addet dasa geas leat logi taleantta. ₂₉Juohkehažžii geas lea, addojuvvo, ja son oažžu valljugasat, muhto geas ii leat, das váldojuvvo eret vel datge mii sus lea. ₃₀Bálkestehket dan gealbbohis bálvaleaddji olggos seavdnjadassii. Doppe sii čirrot ja gižahit bániid.’

₃₁Go Olbmobárdni boahtá hearvásvuođastis oktan buot eŋgeliiddisguin, de son čohkána hearvásvuođas truvdnui. ₃₂Buot álbmogat čohkkejuvvojit su ovdii, ja son rátká sin dego geahčči rátká sávzzaid gáiccain. ₃₃Sávzzaid son bidjá olgeš ja gáiccaid gurut beallái.

₃₄De gonagas cealká daidda geat leat su olgeš bealde: ‘Bohtet, dii geaid mu Áhčči lea buressivdnidan. Dii beassabehtet dál árbet riikka mii lea leamaš ráhkaduvvon din várás máilmmi sivdnideami rájes. ₃₅Mun ledjen nealgumin, ja dii attiidet munnje borrat. Mun ledjen goikamin, ja dii attiidet munnje juhkat. Mun ledjen amas, ja dii válddiidet mu lusadet. ₃₆Mun ledjen álás, ja dii bivttasteiddet mu. Mun ledjen buohcamin, ja dii galledeiddet mu. Mun ledjen giddagasas, ja dii bođiidet mu lusa.’

₃₇Dalle vanhurskásat vástidit sutnje: ‘Hearrá, goas mii oinniimet du nealgumin ja attiimet dutnje borrat, dahje goikamin ja attiimet dutnje juhkat? ₃₈Goas mii oinniimet du amasin ja válddiimet du lusamet, dahje álásin ja bivttasteimmet du? ₃₉Goas mii oinniimet du buohcamin dahje giddagasas ja galledeimmet du?’ ₄₀Gonagas vástida sidjiide: ‘Duođaid, mun cealkkán didjiide: Buot maid lehpet dahkan oktii dáin mu uhcimus vieljain, dan dii lehpet dahkan munnje.’

₄₁Dasto son cealká daidda geat leat su gurut bealde: ‘Mannet eret mu luhtte, dii geat lehpet garuhuvvon, agálaš dollii mii lea ráhkaduvvon beargalahkii ja su eŋgeliidda. ₄₂Mun ledjen nealgumin, ehpetge dii addán munnje borrat. Mun ledjen goikamin, ehpetge dii addán munnje juhkat. ₄₃Mun ledjen amas, ehpetge dii váldán mu lusadet. Mun ledjen álás, ehpetge dii bivttastan mu. Mun ledjen buohcamin ja giddagasas, ehpetge dii galledan mu.’

₄₄Dalle siige jerret: ‘Hearrá, goas mii oinniimet du nealgumin dahje goikamin dahje amasin dahje álásin dahje buohcamin dahje giddagasas, eatge veahkehan du?’ ₄₅Dalle son vástida sidjiide: ‘Duođaid, mun cealkkán didjiide: Buot maid lehpet guođđán dagakeahttá oktii dáin uhcimusain, dan dii lehpet guođđán dagakeahttá munnje.’

₄₆Ja nu sii vulget agálaš ráŋggáštussii, muhto vanhurskásat agálaš eallimii.”