Siona boahtteáigi
1Muhto boahtá vel áigi
goas Hearrá tempela várri čuožžu nanusin.
Váriin alimussan dat allána,
alážiin bajimužžan,
ja álbmogat márret dohko.
2Máŋggat álbmogat vulget johtui
ja dadjet:
“Bohtet, vulgot Hearrá várrái,
Jakoba Ipmila vissui!
Son oahpaha midjiide geainnuidis,
ja mii dáhttut vádjolit su bálgáid mielde.
Dasgo Hearrá láhka vuolgá Sionis,
Jerusalemis Hearrá sátni.”
3Son dubme álbmogiid gaskkas,
ásaha vuoigatvuođa fámolaš álbmogiidda
mat orrot lahka ja guhkkin.
Miehkit derpojuvvojit plogaávjun
ja sáittit viidnegárdeniibin.
Ii oktage álbmot šat lokte miehki
nuppi vuostá
iige hárjehala soahtat.
4Dalle juohkehaš oažžu čohkkát
oadjebassan iežas viidnemuora
ja fiikonmuora vuolde.
Ná Hearrá, Almmiveagaid Ipmil,
lea sárdnon.
5Eará álbmogat bálvalit iežaset ipmiliid,
muhto mii bálvalit Hearrá, min Ipmila,
álo ja agálaččat.
6Dan beaivvi, cealká Hearrá,
mun čohkken skierpmáid,
čoakkán daid geat leat šaddan hájilassii,
buohkaid geaiguin
lean meannudan garrasit.
7Skierpmáid mun dagan
iežan eatnama árbbolažžan,
fámolaš álbmogin
daid geat leat šaddan hájilassii.
Hearrá lea sin gonagas Sionváris
álo ja agálaččat.
8Don várdotoardna, nieida Siona dievvá,
don oaččut fas dan válddi
mii dus lei ovdal,
Jerusalema gonagasvuođa.
9Manin don čuorvvut
ja luoimmat, Jerusalem?
Iigo dus leat šat gonagas,
leago du ráđđeaddi duššan?
Donhan bodnjasattat
dego nisson riegádahttinávttain.
10Luoimma ja bodnjasatta, nieida Sion,
dego riegádahtti nisson,
danin go don fertet vuolgit gávpogis
ja ássat meahccái,
gitta Babylona rádjái don gárttat mannat.
Doppe don goittotge gáddjojuvvot,
Hearrá lonista du du vašálaččaid gieđas.
11Muhto dál ollu álbmogat
leat čoagganan du vuostá ja dadjet:
“Sion heahppášuhttojuvvo,
ja mii beassat geahččat!”
12Muhto dat eai dovdda Hearrá jurdagiid,
eai ipmir su ulbmiliid:
Son lea čohkken álbmogiid
dego gordnegihpuid gordneráidnensadjái.
13Riema ráidnet, nieida Sion!
Mun attán dutnje ruovdečorvviid
ja veaikegaccaid.
Don cuvket ollu álbmogiid
ja vihahat sállaša oaffarin Hearrái,
daid dávviriid oppa máilmmi
ráđđejeaddjái.
14Muhto dál, nája muođuidat!
Mii leat birastahttojuvvon!
Vašálaččat časket soppiin
Israela ráđđejeaddji nirrii.
