Betlehemis boahtá ráfigonagas
1Don Betlehem, don Efrata,
don leat uhcimus Juda sogain!
Muhto dus mun divttán boahtit
Israelii ráđđejeaddji.
Su álgu lea dološ áiggiin,
agálašvuođa beivviin.
2Hearrá guođđá Israela dušše
dassážii go riegádahtti lea riegádahttán.
De israellaččaid lusa máhccet
sin vieljat geat leat báhcán.
3Son čuožžila ja geahččá ealus
Hearrá fámuin,
Hearrá, su Ipmila, alla namas.
Sii besset ássat oadjebassan,
dál go su stuorisvuohta ollá
eatnama ravddaide.
4Son lea min ráfi.
Go assyrialaččat bohtet min eatnamii
ja bahkkejit min ladniide,
de mii bidjat sin vuostá čieža báimmana,
gávcci oaivámučča.
5Sii guođohit mihkiin Assyria,
rohttejuvvon vearjjuiguin Nimroda eatnama.
Son beastá min assyrialaččain,
go sii bohtet min eatnamii
ja bahkkejit min rájiid badjel.
6Jakoba bázahas álbmogiid searvvis
lea dego Hearrá suoldni,
nugo arvečalmmit rásiin.
Dat ii dárbbaš ovttage olbmo
iige leat geange sávvamis.
7Jakoba bázahas álbmogiid searvvis,
ollu álbmogiid gaskkas,
lea dego ledjon meahci elliid gaskkas,
dego nuorra ledjon sávzaealus.
Dat falleha ja duolbmá,
dat gaikkoda, iige oktage gájo.
8Lokte gieđa vašálaččaidat vuostá,
nu ahte dat buot duššet!
9Dan beaivvi, cealká Hearrá,
mun duššadan buot du heasttaid
ja billistan du soahtevovnnaid.
10Mun duššadan
buot du eatnama gávpogiid
ja gaikkodan du ladniid.
11Mun duššadan du noaidegoansttaid,
eaige dus leat šat mearkačilgejeaddjit.
12Mun duššadan du ipmilgovaid
ja geađgebácciid.
Dii ehpet šat gopmir ehpetge rohkadala
dan maid dii ieža lehpet duddjon.
13Mun gaikkun du ašeračuolddaid
ja duššadan du gávpogiid.
14Buolli moaristan mun mávssahan
daidda álbmogiidda mat eai dáhto gullat.
