4. Mosesgirji 10

₁Hearrá sártnui Mosesii:

₂Divtte dearpat guokte silbadorvve maiguin searvegoddi rávkojuvvo čoahkkái ja siiddaide addojuvvo vuolginmearka. ₃Go goappašat dorvvet bossojuvvojit, de oppa searvegoddi galgá čoahkkanit du lusa almmustusgoađi ovdii, ₄muhto jos dušše nubbi bossojuvvo, de galget jođiheaddjit, Israela čearddaid oaivámuččat, čoahkkanit du lusa. ₅Go bossubehtet várrehusčuojaheami, de galget nuorttabeale siiddat vuolgit johtui, ₆ja go nuppes bossubehtet várrehusčuojaheami, de galget lulábeale siiddatgis vuolgit johtui. Várrehusčuojaheapmi bossojuvvo vuolginmearkan. ₇Go searvegoddi rávkojuvvo čoahkkái, de galgabehtet bossut dorvviid, muhto allet boso várrehusčuojaheami. ₈Dorvviid ožžot bossut dušše báhpat, Arona bártnit. Dat galgá leat didjiide agálaš láhka buolvvas bulvii. ₉Go dii iežadet eatnamis vuolgibehtet soahtat vašálaččain gii falleha din, de galgabehtet bossut várrehusčuojaheami. Dalle Hearrá, din Ipmil, muitá din, ja dii bihtibehtet vašálaččaineattet. ₁₀Bossot dorvviid maiddái iežadet ávvubeivviid, allabasiid ja mánočalbmebeivviid go oaffaruššabehtet boaldinoaffariid ja searvevuođaoaffariid, de Ipmil muitá din. Mun lean Hearrá, din Ipmil.

₁₁Nuppi jagi nuppi mánu guoktelogát beaivvi balva badjánii lihtumearkka goađi badjelis. ₁₂Dalle israellaččat vulge johtui Sinaimeahcis ja johte luoitalansajis nubbái, dassá go balva bisánii Paranmeahccái. ₁₃Nu sii vuosttaš geardde johttájedje nugo Hearrá lei gohččon Mosesa bokte.

₁₄Ovddimuš vulggii johtui Juda siida mearkkaidisguin ja buot soahteveagaidisguin. Juda čeardda soahteveaga njunnošis lei Nahšon, Amminadaba bárdni, ₁₅Isaskara čeardda soahteveaga njunnošis lei Netanel, Suara bárdni, ₁₆ja Sebulona čeardda soahteveaga njunnošis lei Eliab, Helona bárdni. ₁₇De sii njeide goađi, ja geršonlaččat ja merarilaččat johttájedje ja gudde goađi.

₁₈Dasto vulggii johtui Rubena siida mearkkaidisguin ja buot soahteveagaidisguin. Rubena čeardda soahteveaga njunnošis lei Elisur, Šedeura bárdni, ₁₉Simeona čeardda soahteveaga njunnošis lei Šelumiel, Surisaddaja bárdni, ₂₀ja Gada čeardda soahteveaga njunnošis lei Eljasaf, Deuela bárdni. ₂₁Dasto vulge johtui kehatlaččat geat gudde bassi biergasiid. Goahti galggai ceggejuvvot ovdal go sii bohte.

₂₂Dasto vulggii johtui Efraima siida mearkkaidisguin ja soahteveagaidisguin. Efraima čeardda soahteveaga njunnošis lei Elišama, Ammihuda bárdni, ₂₃Manasse čeardda soahteveaga njunnošis lei Gamliel, Pedasura bárdni, ₂₄ja Benjamina čeardda soahteveaga njunnošis lei Abidan, Gidoni bárdni.

₂₅Dasto vulggii johtui buot siiddaid maŋušin Dana siida mearkkaidisguin ja soahteveagaidisguin. Dana čeardda soahteveaga njunnošis lei Ahieser, Ammišaddaja bárdni, ₂₆Ašera čeardda soahteveaga njunnošis lei Pagiel, Okrana bárdni, ₂₇ja Naftali čeardda soahteveaga njunnošis lei Ahiel, Enana bárdni.

₂₈Dán ortnegis israellaččat johte go sii sirdájedje báikkis báikái.

₂₉Moses dajai máhkasis Hobabii, midjanlaš vuohpas Reuela bárdnái: “Mii vuolgit dál dan eatnamii maid Hearrá lea lohpidan addit midjiide. Vuolgge minguin, de don oaččut oasi buot buriin maid Hearrá lea lohpidan Israelii.” ₃₀Muhto Hobab vástidii: “In mun vuolgge. Mun dáhtun máhccat iežan eatnamii ja iežan soga lusa.” ₃₁Moses dajai: “Ale goit guođe min! Don dieđát buoremusat gosa mii sáhttit luoitalit meahcis. Boađe oahpistit min. ₃₂Jos don vuolggát minguin, de oaččut oasi buot buriin maid Hearrá addá midjiide.”

₃₃Israellaččat vulge Hearrá vári luhtte ja vádjoledje golbma beaivása, ja Hearrá lihtuárka manai oppa áigge sin ovddas ja ozai sidjiide vuoiŋŋastanbáikkiid. ₃₄Hearrá balva lei sin badjelis juohke beaivvi go sii vulge johtui luoitalansajisteaset.

₃₅Juohke háve go árka vulggii johtui, de Moses dajai: