4. Mosesgirji 33

₁Dát leat israellaččaid gohttenbáikkit dan rájes go sii soahteveagaid soahteveagaid vulge Mosesa ja Arona geahčus Egyptas. ₂Juohke háve go israellaččat vulge gohttenbáikkisteaset, de Moses čálii Hearrá gohččuma mielde muitui báikki nama. Dát lea logahallan sin gohttenbáikkiin. ₃Israellaččat vulge Ramsesis vuosttaš mánu vihttanuppelogát beaivvi. Beaivvi maŋŋil beassážiid sii vulge roahkkadit johtui buot egyptalaččaid oaidnut, ₄dan botta go egyptalaččat ledje hávdádeamen iežaset vuosttašriegádeddjiid. Hearrá lei goddán sin ja nu diktán duomuidis deaividit egyptalaččaid ipmiliid.

₅Ramsesis israellaččat manne Sukkotii ja luoitaledje dohko. ₆ De sii vulge Sukkotis ja luoitaledje Etamii, meahci ravdii. ₇Go sii ledje vuolgán Etamis, de sii gávve Pi-Hahirota guvlui mii lea Baal Sefona buohta, ja luoitaledje Migdola lahkosii. ₈Go sii ledje vuolgán Pi-Hahirotis, de sii manne meara rastá meahccái, johte golbma beaivása Etammeahcis ja luoitaledje Marai. ₉Maras sii manne Elimii. Elimis ledje guoktenuppelohkái čáhceádjaga ja čiežalogi pálbmamuora, ja sii luoitaledje dohko. ₁₀Elima maŋŋil sii luoitaledje Ruksesmeara gáddái. ₁₁Ruksesmeara gáttis sii manne Sinmeahccái ja luoitaledje dohko. ₁₂Sinmeahcis sii manne Dofkai. ₁₃Dofkas sii manne Alušii. ₁₄ Sii vulge Alušis ja luoitaledje Refidimii, muhto doppe álbmogii ii lean čáhci juhkat. ₁₅Refidimis sii manne Sinaimeahccái ja luoitaledje dohko. ₁₆Sii vulge Sinaimeahcis ja luoitaledje Kibrot Hattaavai, ₁₇ Kibrot Hattaavas Haserotii, ₁₈Haserotis Ritmai, ₁₉Ritmas Rimmon Peresii, ₂₀Rimmon Peresis Libnai, ₂₁Libnas Rissai, ₂₂Rissas Kehelatai, ₂₃Kehelatis Šefervári vuollái, ₂₄Šefervári vuolde Haradai, ₂₅Haradis Makhelotii, ₂₆Makhelotis Tahatii, ₂₇Tahatis Terahii, ₂₈Terahis Mitkai, ₂₉Mitkas Hašmonai, ₃₀Hašmonas Moserotii, ₃₁Moserotis Bene-Jaakanii, ₃₂Bene-Jaakanis Hor-Hagidgadii, ₃₃Hor-Hagidgadis Jotbatai, ₃₄Jotbatas Abronai, ₃₅Abronas Esjon-Geberii ₃₆ja Esjon-Geberis Sinmeahccái Kadešii. ₃₇Kadešis sii manne Horvári vuollái Edoma rájá ala ja luoitaledje dohko.

₃₈Báhppa Aron manai Hearrá gohččuma mielde Horvárrečohkkii, ja dohko son jámii. Dat dáhpáhuvai njealljelogi jagi maŋŋil go israellaččat ledje vuolgán Egyptas, viđát mánu vuosttaš beaivvi. ₃₉Aron lei čuođiguoktelogigolmmajahkásaš go jámii Horvárrái.

₄₀Kanaanlaš Arada gonagas, gii ásai Negevis Kanaanis, gulai ahte israellaččat ledje boahtimin.

₄₁Go israellaččat ledje vuolgán Horváris, de sii manne Salmonai ja luoitaledje dohko. ₄₂Sii vulge Salmonas ja luoitaledje Punonii, ₄₃de Obotii ₄₄ja de Ije Abarimii Moaba rájá ala. ₄₅Sii vulge Ije Abarimis ja luoitaledje Dibon Gadii, ₄₆de Almon Diblatajimii ₄₇ja de Abarimváriide Nebo buohta. ₄₈Go sii ledje vuolgán Abarimváriin, de sii luoitaledje Moaba duolbadasaide Jordangáddái Jeriko buohta. ₄₉Jordangáttis sin siida olii Bet-Haješimotis Abel Hašittimii.

₅₀Moaba duolbadasain Jordangáttis Jeriko buohta Hearrá sártnui Mosesii:

₅₁Cealkke israellaččaide: Go dii lehpet mannan Jordana rastá Kanaanii, ₅₂de duššadehket ovddasteattet buot dan eatnama ássiid. Duššadehket buot sin geađgái čullojuvvon eahpeipmiliid ja buot sin leikejuvvon ipmilgovaid, ja heavahehket buot sin oaffarbáikkiid. ₅₃Váldet eatnama oapmineattet ja ásset dohko, dasgo mun attán dan didjiide oapmin. ₅₄Juogadehket eatnama vuorbádemiin sogaid mielde. Stuorra sohkii galgabehtet addit stuorra oasi ja unna sogažii unna oasáža. Juohke sohka galgá oažžut oasi doppe gos vuorbi mearrida. Juogadehket eatnama áhčiideattet čearddaid mielde. ₅₅Muhto jos dii ehpet áje eret eatnama ássiid, de dat geaid diktibehtet báhcit, šaddet biikan din čalmmiide ja seahčagassan din gilgii, ja sii fallehit din dan eatnamis gos ássabehtet. ₅₆Ja dan maid mun áigon dahkat sidjiide, mun dagange didjiide.