4. Mosesgirji 34

₁Hearrá sártnui Mosesii: ₂Atte israellaččaide dán gohččuma. Dii boahtibehtet dál Kanaanii, dan eatnamii maid oažžubehtet oapmineattet. Dát leat Kanaana eatnama ráját:

₃Lullin din eatnama rádjá manná Sinmeahcis Edoma guora. Dát rádjá álgá nuortin Jápmameara lulágeažis, ₄gávvá de Akrabbimgorgŋehaga guvlui ja manná dan lulábeali Sina bokte Kadeš Barnea lulábeallái. Doppe rádjá manná Hasar-Addarii ja Asmonii, ₅gávvá de Egypta rádjejoga guvlui ja dan mielde merrii. ₆Oarjin din rádjá lea Gaskamearra. Dat lea din oarjerádjá. ₇Dát lea din davverádjá: Merkejehket rájá Gaskamearas Horvárrái, ₈Horváris Lebo-Hamatii doppe Sedadii. ₉Doppe rádjá manná Sifronii ja ain Hasar-Enana rádjái. Dat lea din davverádjá. ₁₀Nuortarájá dii galgabehtet merket Hasar-Enanis Šefamii ₁₁gokko rádjá manná vulos Riblai, Ajina nuorttabeallái ja doppe ain Gennesaretjávregátti nuorttabeale várrevieltái. ₁₂Doppe rádjá manná Jordanii ja dan mielde Jápmamerrii.

Dát lea din eanan, ja dát leat dan ráját.

₁₃Moses attii israellaččaide dán gohččuma: “Dát lea dat eanan maid galgabehtet juogadit gaskkaneattet vuorbádemiin. Hearrá lea gohččon addit dan ovcci čerdii ja ovtta čeardabeallái, ₁₄dasgo Rubena ja Gada čearddaid ja Manasse čeardabeale bearrašat leat juo ožžon iežaset oasi eatnamis. ₁₅Dát guokte čeardda ja okta čeardabealle leat juo ožžon opmodagaset Jordana nuorttabealde Jeriko buohta.”

₁₆Hearrá sártnui Mosesii:

₁₇Dát guovttos, báhppa Elasar ja Josua, Nuna bárdni, leaba dat olbmát geat galgaba juogadit didjiide eatnama. ₁₈Dán bargui galgabehtet váldit vel oaivámučča guđege čearddas. ₁₉Dát leat dat olbmát: Juda čearddas Kaleb, Jefunne bárdni, ₂₀Simeona čearddas Samuel, Ammihuda bárdni, ₂₁Benjamina čearddas Elidad, Kislona bárdni, ₂₂Dana čearddas oaivámuš Bukki, Jogli bárdni, ₂₃Josefa bártni Manasse čearddas oaivámuš Hanniel, Efoda bárdni, ₂₄ja Efraima čearddas oaivámuš Kemuel, Šiftana bárdni, ₂₅Sebulona čearddas oaivámuš Elisafan, Parnaka bárdni, ₂₆Isaskara čearddas oaivámuš Paltiel, Assana bárdni, ₂₇Ašera čearddas oaivámuš Ahihud, Šelomi bárdni, ₂₈ja Naftali čearddas oaivámuš Pedahel, Ammihuda bárdni.

₂₉Dáid olbmáid Hearrá mearridii juogadit opmodaga israellaččaide Kanaana eatnamis.