Sátneláskkut 12

₁Dat gii ráhkista bagadusa,

ráhkista dieđu,

doavki lea dat gii vašuha cuiggodusa.

₂Buorre olmmoš oažžu árpmu Hearrás,

behtolaš olbmo son dubme sivalažžan.

₃Bahávuohta ii atte olbmui coavcci,

muhto vanhurskásiid ruohtas

ii lihkahuvvo.

₄Hágas áhkká lea boadnjás kruvdnu,

guttaheapme lea dego

dávttiid guohcageapmi.

₅Vanhurskásiid mearri

lea vuoiggalašvuohta,

ipmilmeahttumiid ulbmi lea beahtus.

₆Ipmilmeahttumiid ságat

vuđgŋet vara,

vuoigatlaččaid sánit gádjot sin.

₇Ipmilmeahttumat njeidojuvvojit

eaige šat leat,

vuoigatlaččaid viessu

bissu nanusin.

₈Nu olmmoš rámiduvvo

go sus lea jierbmi,

duihmi šaddá badjelgeahčahassan.

₉Buoret badjelgehččojuvvon olmmoš

geas lea bálvá

go stuorástalli geas váilu láibi.

₁₀Vuoigatlaš olmmoš

atná fuola omiinis,

ipmilmeahttumiid váibmu

lea árpmuheapme.

₁₁Dat gii gilvá bealddus,

borrá gallás,

gii háhpohallá guorusvuođa,

lea jierpmeheapme.

₁₂Ipmilmeahttuma hálidus

lea bahái,

vanhurskásiid ruohtas lea nanus.

₁₃Ipmilmeahttuma behtolaš sánit

šaddet sutnje giellan,

vanhurskkis beassá áŧestusas.

₁₄Njálmmi sánit gallehit olbmo,

su gieđaid dagut

máksojuvvojit sutnje.

₁₅Jalla atná iežas vádjolusa vuoigadin,

viissis dat gii guldala rávvagiid.

₁₆Jalla moarri gulustuvvá dallánaga,

viissis olmmoš ii beroš

juohke bilkosánis.

₁₇Ávdás duođašteaddji muitala duođa,

vearreduođašteaddji sárdnu behttosa.

₁₈Jurddaškeahtes sánit

čuggejit dego miehkki,

viisáid sárdnun dálkkoda.

₁₉Duohta sánit bissot agálaččat,

behtolaš ságat

dušše čalbmeravkalanbotta.

₂₀Juonalaččaid váimmus lea beahtus,

dat geat nevvodit buorrái, besset illudit.

₂₁Ii mihkkege baháid

deaivit vuoigatlačča,

ipmilmeahttumiin

leat ollu lihkuhisvuođat.

₂₂Hearrá fasttáša gielis olbmuid,

vuoigatlaččat leat su miela mielde.

₂₃Jierpmálaš olmmoš čiehká

maid diehtá,

doavki gulaha

iežas diehtemeahttunvuođa.

₂₄Viššalis giehta oažžu fámu,

láikodat doalvu šlávvabargui.

₂₅Moraš losidahttá olbmo váimmu,

ustitlaš sátni illudahttá dan.

₂₆Vanhurskkis vealtá bahás,

ipmilmeahttumiid geaidnu čádjidahttá.

₂₇Láiki ii fidne sállaša,

viššalis olmmoš

oažžu mávssolaš dávviriid.

₂₈Vanhurskkisvuođa bálgás

lea eallin,

dat geaidnu ii leat jápmima geaidnu.