Sátneláskkut 16

₁Váimmu jurdagat gullet olbmui,

muhto vástádusa addá Hearrá.

₂Buot olbmo geainnut leat buhttásat

su iežas čalmmiin,

muhto Hearrá geahččala

olbmo vuoiŋŋa.

₃Bija Hearrá háldui buot maid dagat,

de du áigumušat lihkostuvvet.

₄Hearrá lea sivdnidan buot

dihto ulbmila várás,

ipmilmeahttumage

lihkuhisvuođa beaivái.

₅Hearrá fasttáša

juohke čeavlás olbmo –

duođaid, eai sii beasa

ráŋggáškeahttá.

₆Árbmugasvuohta ja oskkáldasvuohta

soabahit suttu,

Hearrá ballu gáidada olbmo bahás.

₇Go Hearrá liiko olbmo geainnuide,

de son oažžu ráfi velá vašálaččaidisguinge.

₈Buoret uhccánaš vuoigatvuođas

go stuorra vuoittut vearrivuođas.

₉Olmmoš jurddaša iežas geainnu,

muhto Hearrá stivre su lávkkiid.

₁₀Gonagasa sátni

lea Ipmila mearrádus,

dubmedettiin son ii meaddát.

₁₁Rivttes veavttat gullet Hearrái,

son lea dahkan buot veaktageđggiid.

₁₂Gonagasat fasttášit ipmilmeahttun

meanuid,

dasgo vanhurskkisvuohta

nanne truvnnu.

₁₃Vuoigatlaš sárdnun

lea gonagasa miela mielde,

son ráhkista dan gii sárdnu duođa.

₁₄Gonagasa moarri lea jápmima áirras,

muhto viissis olmmái

jaskkodahttá su.

₁₅Gonagasa muođuid čuovga

mearkkaša eallima,

su buorredáhtolašvuohta

lea dego giđđaarvi.

₁₆Buoret go golli

lea háhkat viissisvuođa,

mávssoleabbo go silba

lea háhkat jierpmi.

₁₇Vuoigatlaččaid geaidnu garvá bahá,

heakkas várjala dat gii dárko lávkkiidis.

₁₈Čeavli doalvu hevvui,

goargatvuohta doalvu jorraleapmái.

₁₉Buoret eallit vuollegažžan

ovttas vártnuhemiiguin

go juogadit sállaša čeavlás olbmuiguin.

₂₀Dat gii bargá jierpmálaččat,

gávdná buriid,

ávdugas dat gii dorvvasta Hearrái.

₂₁Dat geas lea viissis váibmu,

gohčoduvvo jierpmálažžan,

sánálašvuohta jáhkiha olbmo.

₂₂Jierbmi lea viisásii eallima ája,

dovkkiid ráŋggáštus

lea sin iežaset jallavuohta.

₂₃Viisá váibmu dahká su njálmmi

jierpmálažžan,

bidjá su baksamiidda ain eambbo oahpa.

₂₄Ustitlaš sánit leat dego honnet –

njálgát sillui

ja dearvvašlaččat rupmašii.

₂₅Dat mii orru leamen

rivttes geaidnu

sáhttá dattetge doalvut jápmimii.

₂₆Bargi olbmo nealgi barggaha su,

su iežas čoavji gevre su.

₂₇Návccahis olmmái roggá bahávuođa,

su baksamiin buollá duššadeaddji dolla.

₂₈Juonalaš olmmái dahká bealkkuid,

šláttardeaddji earuha ustibaččaid.

₂₉Veahkaválddálaš olmmái

fille lagamuččas,

doalvu su geidnui mii ii leat buorre.

₃₀Dat gii geahččá siđvečalmmiid,

hutká bahá,

gii čárvu baksamiiddis,

lea dan juo ollašuhttán.

₃₁Čurges vuovttat leat gudnegierdu,

vanhurskkisvuođa geainnus

dat leat gávdnamis.

₃₂Buoret go soahtesáŋgár

lea gierdavaš olmmoš,

buoret lea ráđđet iežas miela

go váldit gávpoga.

₃₃Vuorbi suhppejuvvo askái,

muhto Hearrá mearrida bohtosa.