Sátneláskkut 17

₁Buoret goikeláibebihttá ja ráfi

go viesu dievva herskot ja bealku.

₂Jierpmálaš šlávva

ráđđe gealbbohis bártni

ja oažžu árbet ovttas vieljažiiguin.

₃Silbii stážžu, gollái uvdna,

olbmuid váimmuid geahččala Hearrá.

₄Bahás olmmoš guldala bahás ságaid,

gielástalli billisteaddji sániid.

₅Dat gii bilkida geafi,

hiddjida su sivdnideaddji,

guhte illuda nuppi oasehisvuođa dihte,

ii beasa ráŋggáškeahttá.

₆Mánáidmánát leat vuorrasiid

kruvdnu,

bártniid gudni sin áhčit.

₇Stuorra sánit eai soaba doavkái,

velá uhcit giellásat ráđđejeaddjái.

₈Dat gii atná duolgguid,

gáddá daid leavvedolgin:

Gosa ihkinassii son boahtá,

de son birge.

₉Dat gii bivdá ustitvuođa,

gokčá meaddádusa,

gii dan muitáha, ádjá ustibis eret.

₁₀Cuiggodus cieggá jierpmálažžii

buorebut go čuođi časkkástaga jallii.

₁₁Bahás olmmoš bivdá aivve stuimmi;

su vuostá vuolggahuvvo

árpmuhis áirras.

₁₂Buoret lea boahtit guovžža njeaiga

mas čivggat leat rieviduvvon,

go jalla njeaiga su mielahisvuođas.

₁₃Jos olmmoš mávssaha buori baháin,

de su viesus oasehisvuohta ii gáidda.

₁₄Álggahit bealkku lea

dego ráhpat buođu;

heaitte eret ovdal go bealku buollá!

₁₅Dat gii dubme sivalačča sivaheapmin

ja dat gii dubme vigiheami sivalažžan –

Hearrá fasttáša goappašagaid.

₁₆Maid ávkkuha ruhta jalla gieđas?

Sáhttágo son oastit viissisvuođa

go sus juo váilu jierbmi?

₁₇Ustiba ráhkisvuohta

ii beahte goassege,

viellja lea riegádan veahkehit heađis.

₁₈Jierpmeheapme lea dat

gii addala gieđaid

ja dáhkida lagamuččas ovddas.

₁₉Dat gii ráhkista bealkkuid,

ráhkista suttu,

dat gii dahká uvssas allagin,

ohcá iežas heavu.

₂₀Behtolaš olmmoš ii gávnna lihku,

guoktilaš njuovčča jorralahttá.

₂₁Morraša oažžu dat

geas lea doavkkes bárdni,

jierpmeheami áhčis

ii leat mihkkege iluid.

₂₂Ilolaš váibmu addá dearvvašvuođa,

hearddohuvvan miella ástada dávttiid.

₂₃Bahás olmmoš roggá duolgguid

ozastis

vai beassá botnjat vuoigatvuođa.

₂₄Jierbmás olmmoš atná viisodaga

čalmmiid ovddas,

jalla várdá máilmmi ravddaid.

₂₅Doavkkes bárdni lea váivin

áhččásis,

bahča morašin

dasa guhte riegádahtii su.

₂₆Bahá lea jos sivaheapme sáhkohaddá,

beanta vuoigatvuođa vuostá

jos gutnálaš spihččejuvvo.

₂₇Jierpmálaš seastá sániidis,

lotkesmielat lea viissis.

₂₈Velá doavkige adnojuvvo viissisin

jos son orru jávohaga,

jierpmálažžan

jos son doallá njálmmi gitta.