Sátneláskkut 18

₁Iešlágán olmmoš bivdá iežas hálu;

son falleha buot mii lea jierpmálaš.

₂Doavki ii beroš áddet,

son dáhttu dušše muitalit

iežas oaiviliid.

₃Badjelgeahččan čuovvu

ipmilmeahttuma,

heahpada mielde boahtá bilku.

₄Olbmo sánit leat čiekŋalis čázit,

viissisvuođa ája lea

golggiideaddji jogaš.

₅Ii leat buorre doallat

sivalaš olbmo beali

ja botnjat sivaheami vuoigatvuođa.

₆Jalla baksamat dagahit bealkkuid,

su njálbmi bivdá rissiid.

₇Doavkki njálbmi lea sutnje heavvun,

su sánit šaddet giellan sutnje alccesis.

₈Šláttardeaddji sánit leat dego

herskot,

dat vudjot olbmo siskkildassii.

₉Láikkes bargi lea billisteaddji viellja.

₁₀Hearrá namma lea nana toardna,

vanhurskkis viehká dohko

ja gávdná suoji.

₁₁Riggá opmodat lea su nana ladni,

dego alla muvra – nu son gáddá.

₁₂Čeavli doalvu jorraleapmái,

vuollegašvuohta lea geaidnu gudnái.

₁₃Jos muhtun vástida

ovdal go lea guldalan,

de son lea doavki ja oažžu heahpada.

₁₄Roahkkatvuođain olmmoš

gierdá buozalvasage,

muhto gii gierdá hearddohuvvan miela?

₁₅Jierpmálaš háhká dieđu,

viisát guldalit ja ohppet.

₁₆Attáldat rahpá uvssaid,

doalvu su stuorráid lusa.

₁₇Dat gii rievttis vuosttažin sárdnu,

lea vuoigadis –

dassážii go vuostálasti

suokkardišgoahtá su sániid.

₁₈Vuorbi loahpaha riidduid,

dat čoavdá fámolaš

olbmáid gaskavuođaid.

₁₉Loavkašuvvan viellja lea dego

ladnegávpot,

riiddut dego poarttaid smarttit.

₂₀Njálmmi sániin olmmoš gallána,

baksamiid šaddosat dieldnadit su.

₂₁Njuokčama hálddus

lea jápmin ja eallin,

gii dan stivre,

beassá návddašit dan šaddosa.

₂₂Lihku gávdná dat gii áhká gávdná,

son lea ožžon Hearrá buorredáhtu.

₂₃Váivváš átnu vuollegaččat,

rikkis vástida garra sániiguin.

₂₄Ollu ustibat – uhccán ustitvuohta,

duohta ustit lea oskkáldasat go viellja.