Sátneláskkut 21

₁Gonagasa jurdagat leat Hearrá gieđas

dego jogažat,

son sojaha daid gosa dáhttu.

₂Olbmo geaidnu lea njuolgat

su iežas čalmmiin,

muhto Hearrá geahččala váimmu.

₃Daga dan mii lea riekta ja vuoigat,

dat lea Hearrái mávssoleabbo go oaffar.

₄Goargadis čalmmit

ja čeavlás váibmu –

ipmilmeahttumiid lámpá lea suddu.

₅Viššalvuohta ja suokkardeapmi

buktá valljugasvuođa,

huššáivuohta dušše vádjitvuođa.

₆Giellásiin fidnejuvvon dávvir

lea nohkavaš vuoiŋŋahat

ja jápmima giella.

₇Ipmilmeahttumat sorrojit

daguidasaset

go sii biehttalit dahkamis

dan mii lea riekta.

₈Sivalačča geaidnu lea moalkái,

buhtis olmmoš vádjola njuolga.

₉Buoret ássat dáhkkečiegas

go seammá viesus bealkálas áhkáin.

₁₀Ipmilmeahttun anistuvvá bahái,

ii son árpmit iežas lagamučča.

₁₁Jos bilkideaddji ráŋggáštuvvo,

de dat lea dáidemeahttumiidda oahppun;

oahpat viisá,

de son váldá vuostá dieđu.

₁₂Vanhurskkis Ipmil atná čalmmis

ipmilmeahttuma viesu,

son norddasta ipmilmeahttumiid

lihkuhisvuhtii.

₁₃Dat gii notká beljiid

gullamis geafes olbmo čuorvuma,

šaddá ieš čuorvut,

muhto ii oaččo vástádusa.

₁₄Čiegus attáldat jaskkodahttá moari,

ohcii čihkkojuvvon duolgu garra suhtu.

₁₅Go vuoigatvuohta dahkkojuvvo,

de vanhurskkis illuda,

muhto vearredahkkái dat lea suorggahus.

₁₆Dat gii čádjida

jierpmálašvuođa geainnus,

gártá jámežiid searvái.

₁₇Geafes olmmájin šaddá dat

gii ráhkista suohttasiid;

gii ráhkista viinni ja oljju,

ii rikko goassege.

₁₈Ipmilmeahttun šaddá

vanhurskása lonisin,

beahtti gártá vuoigatlačča sadjái.

₁₉Buoret ássat ávdin eatnamis

go bealkálas ja buošes áhkáin.

₂₀Viisá viesus leat mávssolaš dávvirat,

jallas olmmoš skihtarda visot.

₂₁Dat gii váinnuha vanhurskkisvuođa

ja oskkáldasvuođa,

oažžu eallima ja gudni.

₂₂Viissis olmmái váldá

veagalaččaid gávpoga

ja gaikkoda sin dorvvolaš suoji.

₂₃Dat gii váruha iežas njálmmi

ja njuokčama,

várjala iežas áŧestusain.

₂₄Bilkára nama oažžu snielis

ja čeavlás olmmoš,

su goarratvuođas ii leat mearri.

₂₅Láikkana hálidus šaddá sutnje

sorbmin,

go su gieđat biehttalit bargamis.

₂₆Jalla lea álo váldimin,

vanhurskkis addá iige hánástatta.

₂₇Ipmilmeahttumiid oaffar

lea fastivuohta,

erenoamážit go sii buktet dan

gávvilis áigumušain.

₂₈Behtolaš duođašteaddji bártašuvvá,

ávddalaš olbmo guldalit.

₂₉Ipmilmeahttun láhtte heabuheamit,

vuoigatlaš olmmoš vádjola stáđđásit.

₃₀Ii mihkkege viissisvuođaid,

jirpmiid iige ráđiid

veahket Hearrá vuostá.

₃₁Heasta sádelastojuvvo

soahtebeaivvi várás,

muhto Hearrá addá vuoittu.