Sátneláskkut 23

₁Go čohkkát beavddis ráđđejeddjiin,

de jurddaš gii lea du muođuid ovddas.

₂Bija vaikko niibbi iežat čoddaga vuostá

jos leat nelgon.

₃Ale borastuva su herskuide,

danne go dat borramuš lea behtolaš.

₄Ale váivvit iežat vai beasat riggut,

leage jierpmálaš ja heaitte eret.

₅Illá leat oppa geahčastange

riggodahkii

ovdal go dat lea juo jávkan,

dat lea ožžon soajáid

ja girdá almmi guvlui dego goaskin.

₆Ale bora utnohis olbmo biepmu,

ale borastuva su njálgga borramušaide,

₇dat lea dego njielašit vuoktačalmmi.

Son dadjá gal dutnje:

“Bora ja juga,”

muhto ii son oaivvil dan.

₈Dan uhccánačča maid leat borran,

don šattat vuoksit,

ja du ustitlaš sánit mannet duššás.

₉Ale sártno jallain,

son badjelgeahččá du jierpmálaš sániid.

₁₀Ale sirdde dološ rádjegeađggi

alege bahkke oarbásiid eatnamii,

₁₁dasgo sin lonisteaddji

lea gievra,

son čuoččuha sin ášši du vuostá.

₁₂Raba váimmot bagadusii

ja beljiidat jierpmálaš sániide.

₁₃Ale divtte bártni leat bagadusa haga,

jos don risset su, de son ii jáme.

₁₄Go don risset su,

de don gájut su jábmiidáimmus.

₁₅Bártnážan, jos du váibmu lea viissis,

de mu váibmu illuda.

₁₆Mu siskkildas ávvuda,

go don sártnut dan mii lea duohta.

₁₇Ale gáđaš suttolaččaid,

muhto áŋgiruša álo vádjolit

Hearrá balus.

₁₈Dalle dus lea boahtteáigi,

iige du doaivu šatta duššin.

₁₉Guldal, bártnážan, ja viisso,

divtte iežat jurdagiid

mannat njulges bálgá.

₂₀Ale šatta juhkkiid

ja vuovddušteddjiid láhkásažžan,

₂₁danin go juhkkit ja borešat gefojit,

ja ođešvuohta gárvvuha sáigguide.

₂₂Guldal áhčát gii sahkanahtii du,

alege badjelgeahča eatnát

go son lea boarásmuvvan.

₂₃Oastte duohtavuođa, ale vuovdde dan,

oččot viissisvuođa,

bagadusa ja áddejumi.

₂₄Vanhurskása áhčči ávvuda jitnosit,

dat geas lea viissis bárdni, beassá illudit.

₂₅Illudahte áhčát ja eatnát,

ávvudehkos dat gii riegádahtii du.

₂₆Bártnážan, luohte munnje,

geahča mo mun ealán

ja vádjol mu geainnu.

₂₇Fuorrá lea čiekŋalis hávdi,

vierronisson gáržžes gáivo.

₂₈Son njágada dego rievvár,

son lasiha oskkáldasmeahttumiid logu.

₂₉Gii luoibmá ja šuohkká?

Gii riidala ja váidala?

Geas leat hávit dušši dihte,

geas rukses čalmmit?

₃₀Das gii gohcá guhká ja juhká viinni,

gii lea boahtán smáhket máisttaviinni.

₃₁Ale geahča viinni ruoksatvuhtii,

mo dat šelggohallá cearkkis

ja álkit golggiha čoddagii.

₃₂Maŋážassii dat gáská

dego gearpmaš,

čuolasta nugo mirkogearpmaš.

₃₃Dalle du čalmmit oidnet ártegiid,

du oaivái badjánit jorggojurdagat.

₃₄Orru dego don livččet guovdu ábi

dahje veallášit stivlegores.

₃₅“Mun huškkohallen,

muhto in mun bávččagan,

mun cápmáhallen,

muhto in mun diehtán maidege.

Goasson mun morránan?

Lasi mun áiggošin viežžat.”