Sálmmaid girji 56

₂Leage munnje árbmugas, Ipmil!

Olbmot bivdalit mu heakka,

sii áŧestit mu álohii.

₃Mu vašálaččat goddalit mu

geažos beaivvi,

eatnagat doarrádallet mu

čeavláivuođasteaset.

₄Go mun lean balus,

de mun dorvvastan dutnje.

₅Ipmilii gean sáni mun rámidan,

Ipmilii mun dorvvastan inge bala.

Maid sáhttá olmmoš

dahkat munnje?

₆Geažos beaivvi sii botnjet

mu sániid,

sii áigot mu vuostá aivve bahá.

₇Sii dahket lihtu mu vuostá

ja šokčet mu,

sii fáktejit mu lávkkiid,

dasgo sii bivdet mu heakka.

₈Muhto sii eai beasa báhtui,

dasgo sii leat bahát.

Ipmil, njeaidde álbmogiid

moaristat!

₉Don leat čállán muitui

mu áŧestusa,

mu gatnjaliid don leat vurken

lihttásat –

almma don leat merken daid iežat girjái?

₁₀Mu vašálaččat geassádit

go mun čuorvvun dutnje.

Mun dieđán ahte Ipmil lea muinna.

₁₁Ipmilii gean sáni mun rámidan,

Hearrái gean sáni mun rámidan,

₁₂Ipmilii mun dorvvastan

inge bala mastege.

Maid sáhttá olmmoš

dahkat munnje?

₁₃Mun deavddán lohpádusa

dutnje, Ipmil,

mun oaffarušan dutnje giittusoaffara.

₁₄Don leat gádjon

mu heakka jápmimis,

beastán mu juolggi jorraleames.

Mun oaččun vádjolit

Ipmila muođuid ovddas

eallima čuovgasis.