Sálmmaid girji 81

₂Ávvudehket Ipmila, min gievravuođa,

bajidehket illučuorvasa Jakoba Ipmilii!

₃Lávlot ja derpet rumbbuid,

čuojahehket čábbát lyraid ja hárppaid.

₄Bossot dorvve mánočalbmebeaivvi,

min bassebeaivvi, go mánnu lea láđas!

₅Dát lea mearrádus Israelii,

Jakoba Ipmila gohččun,

₆láhka maid son attii Josefa sohkii

go dat vulggii Egyptas.

Mun gulan amas jiena.

₇“Mun válden noađi du hárduin,

du gieđat besse luoitilit guoddingore.

₈Don čurvot heađis,

ja mun gádjon du,

čihkosis bajánbalvva siste

mun vástidin dutnje.

Meriba čáhcegáttis

mun geahččalin du. Sela

₉Gula, álbmogan, mun dáhtun várret du.

Vare don gulašit mu, Israel!

₁₀Dus ii oaččo leat eará ipmil,

ale gopmir vieris ipmila.

₁₁Mun lean Hearrá, du Ipmil,

guhte bukten du Egyptas.

Rabas njálmmi,

de mun deavddán dan!”

₁₂Muhto mu álbmot ii gullan mu jiena,

Israel ii dáhtton jeagadit mu.

₁₃De mun luiten sin mannat

buššon váimmuset mielde,

čuovvut iežaset árvalusaid.

₁₄Vare mu álbmot gulašii mu,

vare Israel vádjolivččii mu geainnuid!

₁₅Dalle mun vuolidivččen

dan vašálaččaid,

dan vuostálastiid vuostá

mun bajidivččen gieđa.

₁₆Dat geat vašuhit Hearrá,

fertejit njoammut su ovddas,

sin lihkuhisvuohta bistá agálaččat.

₁₇Muhto Israela son biebmá

buoremus nisuin,

son golggaha dasa bávttis honnega.