Sálmmaid girji 82

Ipmil loaiddasta ovdan

ipmiliid čoakkalmasas,

son cealká ipmiliidda duomu:

₂“Man guhká dii

dubmebehtet vearrut

ja doarjalehket sivalaččaid? Sela

₃Veahkehehket váivvášiid

ja oarbásiid oažžut vuoigatvuođa,

atnet fuola heajuin ja vártnuhemiin,

₄gádjot rávkkiid ja dárbbašeddjiid,

bestet sin baháid gieđas.

₅Dii ehpet dieđe ehpetge ádde maidege,

dii vádjolehpet seavdnjadasas,

ja eatnama vuođđudusat jurbot.

₆Mun lean cealkán:

Dii lehpet ipmilat,

Alimusa bártnit buohkat,

₇muhto dii jápmibehtet

nugo olmmoš jápmá,

gahččabehtet dego oaivámuš gahččá.”

₈Ipmil, čuožžil dubmet eatnama,

dasgo buot álbmogat leat du opmodat.