Sálmmaid girji 83

₂Ipmil, ale šat oro jávohaga!

Ale leage jaska, Ipmil,

ale leage jietnatkeahttá!

₃Du vašálaččat šlápmet,

dat geat vašuhit du, bajidit oaivvi.

₄Sii hutket bahás juonaid

du álbmoga vuostá,

sii ráđđádallet daid vuostá

geaid don suodjalat.

₅Sii dadjet: “Bohtet, jávkadehkot

oppa álbmoga,

vai ii oktage šat muittáše Israela nama!”

₆Sii leat oktii ráđiid

dahkan lihtu du vuostá –

₇Edoma olbmot ja ismaellaččat,

Moab ja hagarlaččat,

₈Gebal, Ammon ja Amalek,

Filistea ja Tyrosa ássit,

₉velá Assurge lea searvan singuin

ja veahkeha Lota bártniid. Sela

₁₀Daga sidjiide nugo Midjanii,

nugo dahket Siserai ja Jabinii

Kišonjogašgáttis.

₁₁Soai heavahuvvuiga En-Dora guoras,

soai šattaiga eatnama duktan.

₁₂Vare sin bajimuččaide geavašii

nugo Orebii ja Seebii,

buot sin oaivámuččaide

dego Sebahii ja Salmunnai!

₁₃Siihan dadjet:

“Mii váldit Ipmila ássansajiid.”

₁₄Mu Ipmil, daga sin rihpaborgan,

sáđđun mat girdet biekkas!

₁₅Nugo dolla boaldá vuovddi

ja dollanjuokčamat buolláhit váriid,

₁₆nu áje sin garra dálkkiinat,

suorggat sin riđuinat!

₁₇Divtte sin muođuid ruvssodit

heahpadis,

dassá go sii ohcet du, Hearrá.

₁₈Vare sin oassi livččii

agálaš ballu ja bilku,

vare sin loahppa livččii heahpatlaš.

₁₉Divtte sin ipmirdit ahte don okto,

don gean namma lea Hearrá,

leat Alimus,

fámolaš oppa eatnamis!