Sálmmaid girji 84

₂Man eahcálaččat leat du ássansajit,

Hearrá, Almmiveagaid Ipmil!

₃Mun áibbašan, velá vuoimmehuvan

go hálidan beassat Hearrá tempelšiljuide.

Mu váibmu ja mu rumaš viggá

ávuin ealli Ipmila guvlui.

₄Leahan cizášge gávdnan saji

ja beskkoš beasi čivggaidasas

du áltáriid luhtte, Hearrá,

Almmiveagaid Ipmil,

mu gonagas ja mu Ipmil.

₅Ávdugasat dat geat ásset du viesus!

Sii máidnot du álelassii. Sela

₆Ávdugasat dat

geaid gievravuohta don leat,

geat áibbašit mannat du tempelii.

₇Go sii vádjolit Čierrunleagi čađa,

de sii dahket dan ádjagiid eanamin,

ja čakčaarvi gokčá dan buressivdnádusain.

₈Sii mannet ovdan fámus fápmui,

dassá go loaiddastit Ipmila ovdii Sionii.

₉Hearrá, Almmiveagaid Ipmil,

gula go mun rohkadalan,

guldal mu, Jakoba Ipmil! Sela

₁₀ Geahča min galbba, Ipmil,

geahča su beallái gean leat vuoidan!

₁₁Okta beaivi du tempelšiljuin

lea buoret go duhát beaivvi muđui.

Buoret lea čuožžut

Ipmila viesu uvssa guoras

go ássat ipmilmeahttumiid goađis.

₁₂Hearrá Ipmil lea beaivváš ja galba,

Hearrá addá árpmu ja gudni.

Son ii biehttal maidege buriid

das gii eallá láitemeahttumit.

₁₃Hearrá, Almmiveagaid Ipmil,

ávdugas dat gii dorvvasta dutnje!