Sálmmaid girji 85

₂Hearrá, don leat leamaš

buorre iežat eatnamii.

Don jorgalit Jakoba oasi,

₃don addet ándagassii álbmogat

suddovealggi,

sihkkot buot sin rihkkumiid. Sela

₄Don hilljudit moarát,

jáddadit iežat buolli vaši.

₅Čuoččáldahte fas min, Ipmil,

min beasti,

ale leage šat vašis midjiide!

₆Bistágo du vašši agálaččat,

leatgo don midjiide moaris buolvvas bulvii?

₇Vare don jorgalivččet fas min beallái,

nu ahte du álbmot beassá illudit du siste!

₈Hearrá, čájet midjiide

ahte leat oskkáldas,

beastte min!

₉Mun guldalan maid Hearrá Ipmil sárdnu.

Son lohpida ráfi álbmogasas,

daidda geat leat sutnje oskkáldasat

– go sii fal eai máhcaše jallavuhtii!

₁₀Duođaid, su bestojupmi

lea lahka daid geat ballet sus,

su hearvásvuohta ássá fas min eatnamis.

₁₁Árbmu ja duohtavuohta gávnnadit,

vanhurskkisvuohta ja ráfi

cummistit nubbi nuppi.

₁₂Oskkáldasvuohta bohciida eatnamis,

vuoigatvuohta geahččá vuolás almmis.

₁₃Hearrá ieš addá buot buriid,

ja min eanan addá šattuidis.

₁₄Vuoigatvuohta manná Hearrá ovddas,

dat dahká geainnu su lávkkiide.