Sálmmaid girji 99

₁Hearrá lea gonagas!

Álbmogat soiget,

su truvnnu guddet kerubat,

eanan doarggista.

₂Stuoris lea Hearrá, Siona Ipmil,

son lea aliduvvon buot álbmogiid badjel.

₃Álbmogat máidnot su stuorra

ja hirbmatlaš nama.

Son lea bassi.

₄Don, fámolaš gonagas,

ráhkistat vanhurskkisvuođa,

don vuođđudit vuoigatvuođa,

oahpahit Jakobii

dan mii lea riekta ja vuoigat.

₅Alidehket Hearrá, min Ipmila,

luoitádehket su juolgevuloža ovdii!

Son lea bassi.

₆Moses ja Aron leigga su báhpat,

Samuel lei daid searvvis geat čurvo su nama.

Sii čurvo Hearrá, ja son vástidii.

₇Balvabáccis son sártnui sidjiide,

ja sii dolle báhkkomiid ja lágaid

maid son attii sidjiide.

₈Hearrá, min Ipmil, don vástidit sidjiide,

don addet sidjiide ándagassii,

muhto mávssahit sidjiide sin daguid.

₉Alidehket Hearrá, min Ipmila,

gopmirdehket su bassi vári guvlui!

Hearrá, min Ipmil, lea bassi.