Irgi
1Don leat čáppat, mu iežan ráhkis,
don leat čáppat!
Du čalmmit beaittaliinni duohken
leat duvvát.
Du vuovttat leat dego gáicaeallu
mii luoitáda Gileada váriin.
2Du bánit leat dego easkka
beaskiduvvon sávzzat
mat leat aiddo goargŋumin lávggus.
Buohkain leat jumežat,
ii oktage dain leat almmá lábbá haga.
3Du baksamat leat dego purpurbáddi,
du njálbmi lea liekkus.
Dego granáhtaehpelbealit
leat du geađđašat beaittaliinni duohken.
4Ebmujin dego Davida toardna
badjána du čeabet.
Duhát galbba leat dasa heaŋggastuvvon,
veagalaččaid njuollaskuohput.
5Dego guokte goddemiesi leat du čiččit,
dat leat nugo gasella jumežat
mat guhtot liljáid gaskkas.
6Go eahkedis gáluda
ja suoivanat guhkkot,
de mun goarkŋun myrravárrái,
njálggaháidievvái.
7Ráhkkásažžan, buot dus lea čáppat,
don leat ollis.
8Njieja váriin, mu moarsi,
boađe mu lusa Libanonis!
Guođe Amana čohka,
Senira ja Hermona alážiid,
ledjoniid biejuid,
leopárddaid váriid.
9Oappážan, moarsážan,
don leat geasuhan alccesat mu váimmu
ovttain geahčastagain,
ovttain čeabetviđjját bearraliin.
10Man hávskái lea du ráhkisvuohta,
oappážan, moarsážan!
Du ráhkisvuohta lea buoret go viidni,
du vuoidasiid hádja
njálgát go buot njálggahájat urtasat!
11Du baksamiin goaiku honnet,
moarsážan,
du njuokčama vuolde honnet ja mielki.
Du biktasiid hádja lea
dego Libanona hádja.
12Dahppojuvvon gilvvagárdi
lea mu oabbá, mu moarsi,
dahppojuvvon gilvvagárdi, seilejuvvon ája.
13Du hearvagárddis leat
granáhtaehpelmuorat šaddosiiddisetguin,
henna ja nardus,
14nardus ja safran, kalmus ja kanela,
juohkelágán njálggahájat muorat,
myrra ja aloe ja fiidnámus máistagat.
15Don leat gilvvagárddi ája,
ealli čázi gáivo,
Libanona jogažat.
Moarsi
16Gohccá, davádat,
boađe, luládat!
Boso mu gilvvagárdái,
vai dan njálgga hádja leavvá
ja mu ustit boahtá gilvvagárdásis
návddašit dan hearvás šaddosiid!
